Idi Septiembre 1, 2022, ti maika-75 a tawen sipud nangrugi ti Tagalog nga edision Ti Pagwanawanan. Sipud idin, ti dandani 600 laeng a kopia ti magasin kada ruar ket nagbalinen a nasurok a 1.2 a milion a kopia ti mayim-imprenta kada ruar. Available met daytan iti elektroniko a kopia iti jw.org.

Nakadanon ti naimbag a damag iti Pilipinas idi pay 1908. Idi nabuangay ti sangay idi 1924, simmayaat ti pannaka-organisar ti trabaho a panangasaba. Ingles idi a literatura ti kangrunaan a maus-usar, ngem nakita dagiti kakabsat a kasapulan a maipatarus dagiti publikasion iti Tagalog.

Kalpasan ti Gubat Sangalubongan II, simmangpet iti Pilipinas idi Hunio 14, 1947 da Earl Stewart, Victor White, ken Lorenzo Alpiche, a naggraduar iti Gilead kas misionero. Dagus nga inyurnos ti kabbaro a naapointaran a branch servant a ni Brother Stewart, a maipatarus Ti Pagwanawanan iti Tagalog babaen kadagiti kualipikado a kakabsat. Iti Septiembre iti dayta a tawen, makaiwarasen dagiti Saksi iti dua nga edision Ti Pagwanawanan iti kada bulan.

Adu kadagiti immuna a paraipatarus ti agtrabaho iti sekular iti aldaw tapno masuportaranda dagiti pamiliada sa ipatarusda dagiti publikasion iti rabii. Maysa ni Brother Hilarion Amores kadagidiay a paraipatarus. Imbagana: “Kasapulan nga agtrabahokami agingga iti alas dos iti parbangon. Ngem nakaragragsakkami gapu ta tumultulongkami tapno maipaay ti naespirituan a kasapulan dagiti kakabsat.”

Iti agdama, adda 97,443 nga agibumbunannag iti 1,126 a Tagalog a kongregasion iti Pilipinas. Adda agarup 76.5 a milion nga agsasao iti Tagalog iti pagilian ken adda nasurok a 115,000 a Tagalog nga agibumbunannag iti intero a lubong. Iti adu a pagilian, maiwarwaras dagiti Tagalog a publikasion a basbasaen dagiti Tagalog a Saksi ken dagiti interesado iti intero a lubong.

Agyamantayo unay ken Jehova ta babaen ti organisasionna, ipapaayna ti naespirituan a taraon ti minilion a tattao iti intero a lubong iti bukodda a lengguahe.—Mateo 24:45, 46.