Makin-abagatan a Luzon ken dagiti kaarrubana nga isla

• Idi Oktubre 25, 2020, dimmalapus ti Bagyo a Molave, a maawagan met Quinta iti Pilipinas, iti probinsia ti Albay iti Bicol. Nakapigpigsa ti bagyo, isu a naapektaran ti intero a Luzon

• Idi Nobiembre 1, 2020, nag-landfall ti Super Typhoon Goni, a maawagan met Rolly iti Pilipinas, iti Catanduanes, ti sabali pay nga isla iti Bicol iti Luzon. Dimmalapus met dayta a Category 5 a bagyo iti dadduma pay a probinsia, a dadduma kadagitoy ti napuruanen gapu iti Bagyo a Molave

• Nangyeg dagitoy dua a bagyo iti napipigsa a tudo ken angin, isu nga adu a lugar ti nalayus ken naawanan iti koriente ken mainum a danum. Adu kadagitoy a lugar ti saan pay a makontak gapu ta awan ti signal wenno internet

• Gapu iti napigsa a tudo, nagayus met ti lahar, wenno dagiti makadadael a pitak, manipud iti Mount Mayon, a nangperdi iti adu a balay iti asideg ti bulkan

• Ginasut nga agibumbunannag ti nangpanaw iti balayda wenno naibakuit

• Maysa a sister nga agtawen iti 89 ti nadangran idi pampanawanna ti balayna nga interamenten a nadadael

• 134 a balay ken 8 a Kingdom Hall ti adda bassit perdina

• 75 a balay ken 8 a Kingdom Hall ti nakaro ti perdina

• 101 a balay ken 1 a Kingdom Hall ti nadadael

• Makitintinnulong dagiti manangaywan iti sirkito ken dagiti panglakayen iti dayta a lugar iti innem a Disaster Relief Committee tapno masigurado nga adda umdas a makan, danum, pagyanan ken dadduma pay a kasapulan dagiti kakabsat. Naannad a sursuroten dagiti kakabsattayo dagiti pagannurotan (safety guideline) tapno maliklikan ti COVID-19 bayat a mangipapaayda iti tulong ken liwliwa

Itultuloytayo nga ikararagan dagiti kakabsattayo a naapektaran kadagitoy nakaro a natural a didigra. Bayat daytoy narigat a tiempo, ammotayo a ni Jehova ti agtultuloy nga “Ama a napnuan iti asi ken Dios ti amin a liwliwa” kadagiti kakabsattayo.—2 Corinto 1:3.