Tultulongan ita dagiti Saksi ni Jehova dagiti kapammatianda ken ti dadduma a biktima ti bagyo a Karen (Sakira ti internasional a naganna) ken ti bagyo a Lawin (Haima ti internasional a naganna). Agsaruno a dinalapus dagita a bagyo ti Luzon idi Oktubre 16 ken 19, 2016. Maibilang a signal number 5 ti bagyo a Lawin, ken maysa kadagiti kapigsaan a bagyo a nangdalapus iti Pilipinas manipud idi timmama ti Super Typhoon Yolanda idi 2013.

Kadagiti 200,000 a Saksi ni Jehova iti Pilipinas, awan ti natay ken awan met ti nakaro a nadangran gapu kadagita a bagyo. Ngem gapu kadagiti napigsa nga angin, layus, ken landslide a resulta ti bagyo a Lawin, adda naireport a nadadael a 1,058 a balbalay ken 43 a Kingdom Hall, wenno lugar a pagdaydayawan.

Nangyurnos ti opisina dagiti Saksi ni Jehova iti Pilipinas iti disaster relief committee idiay Tuguegarao City, Cagayan. Dayta ti mangaw-awat kadagiti relief goods a kas kadagiti makan ken nadalus a danum. Iti agdama, addan walo a trak dagiti relief goods a naipan kadagiti apektado a lugar. Inyurnos met ti branch office dagiti Saksi a mapatakderan dagiti biktima iti temporario a pagyananda ken matarimaan dagiti nadadael a balay ken Kingdom Hall.

As-asikasuen ita ti Bagi a Manarawidwid dagiti Saksi ni Jehova manipud iti world headquarter-da ti dadduma pay a tulong. Ti usarenda a pondo ket dagiti naidonar para iti trabaho a panangasaba dagiti Saksi iti intero a lubong.

Media Contacts:

International: David A. Semonian, Office of Public Information, 1-718-560-5000

Philippines: Dean Jacek, 63-2-224-4444