MANILA, Pilipinas—Rinugian dagiti Saksi ni Jehova iti Pilipinas ti dakkel a panangtulong a proyekto iti panangtarimaan ken panangibangon manen kadagiti balay a dinadael ti Super Typhoon Nina (“Nock-Ten” ti internasional a naganna).

Idi Disiembre 25, 2016, dinalapus ti Signal No. 4 a bagyo a Nina ti Bicol region ket nagadu ti nadadael. Sigun kadagiti report, 10 ti natay ken nasurok a 390,000 a pasdek ti naperdi. Awan ti natay wenno grabe a nasaktan a Saksi ni Jehova iti dayta a lugar, ngem nasurok a 300 a balay dagiti Saksi ken 24 a pasdek a paggigimonganda (maawagan iti Kingdom Hall) ti medio naperdi wenno interamente a nadadael. Nangbukel ti branch office dagiti Saksi ni Jehova iti Pilipinas iti disaster relief committee a nakabase iti Naga City tapno matulongan dagiti naapektaran a pamilia a Saksi.

“Addan 271 a balay dagiti padami a Saksi ken 22 a Kingdom Hall a natarimaan dagiti boluntariomi. Agtultuloy a tumultulong dagiti relief construction team-mi a mangtarimaan iti nabatbati pay a 38 a balbalay ken 2 a Kingdom Hall ket naiplano a malpas dagita iti ngudo ti Abril 2017,” kuna ni Dean Jacek, a pannakangiwat dagiti Saksi ni Jehova iti Pilipinas.

Iwanwanwan ti Bagi a Manarawidwid dagiti Saksi ni Jehova ti sangalubongan a trabahoda, a pakairamanan ti panangtulong kadagiti naapektaran kadagiti kalamidad, ken masupsuportaran dayta a trabaho babaen kadagiti boluntario a donasion. Iti nasurok a 8 a milion a Saksi ni Jehova iti intero a lubong, nasurok a 209,000 ti adda iti Pilipinas.

Media Contacts:

International: David A. Semonian, Office of Public Information, +1-845-524-3000

Pilipinas: Dean Jacek, +63-2-224-4444