Inton Pebrero 1, 2021, * mabalin nga ipakaammonto ti Abakan City Court of the Republic of Khakassia ti desisionna iti kaso da Brother Roman Baranovskiy ken ti nanangna a ni Sister Valentina Baranovskaya. Saan pay nga imbaga ti prosecutor no ania ti kayatna a dusada.

Roman Baranovskiy

• Nayanak: 1974 (Balakovo, Saratov Region)

• Pakasaritaanna: Agtartarimaan kadagiti balay tapno adda pagbiagda nga agina. Magusgustuanna ti aggitara, ken agay-ayam iti chess ken soccer

  Idi tin-edyer pay laeng, pampanunotenna no ania ti kaipapanan ti biag. Malagipna, “No dadduma, kidkiddawek iti Dios nga iturongnak iti umiso a dana.” Nangrugi a nakipagadal iti Biblia kadagiti Saksi ni Jehova idi 1993. Nabautisaran idi 1997

Valentina Baranovskaya

• Nayanak: 1951 (Vannovka, Kazakhstan)

• Pakasaritaanna: Nagtrabaho kas accountant ken financial planner agingga a nagretiro idi 2006. Magusgustuanna ti agluto ken agputar kadagiti kanta ken daniw

  Nangrugi a nakipagadal iti Biblia kadagiti Saksi ni Jehova idi 1995 a kadua ti anakna. Nasdaaw unay idi naammuanna a saan nga agulbod ti Dios. Nabautisaran idi 1996

Idi rabii ti Abril 10, 2019, uppat a balay ti sinerrek dagiti polis idiay Abakan. Karaman iti dayta ti balay ni Brother Roman Baranovskiy ken ti nanangna a ni Valentina. Kinompiskar dagiti polis dagiti Biblia, gadyet, ket personal a dokumentoda. Kalpasanna, indarumda da Roman ken Valentina.

Imbaga ni Roman: “Idi sinerrekda ti balaymi, madama idi ti gimong iti tengnga ti lawas ken kalkalpasmi a napagsasaritaan ti 1 Corinto 10:13. Napateg ti masursurotayo iti daytoy—saan a ni Jehova ti agdesision no ania a pannubok ti pakaipasanguantayo . . . Saanna nga ibagbaga: ‘Natibkerka isu a daytoy a suot ti para kenka. Sika, gapu ta nakapkapuyka, nalaklaka ti para kenka.’ No kasta ti mapasamak, agpannuraytayon iti bukodtayo a bileg. Agduduma a pannubok ti mabalin a pakaipasanguan ti asinoman kadatayo. No agpannuraytayo iti bileg ni Jehova, makapagibturtayo amin.”

Idi Hulio 2020, naistrok ni Valentina. Malagipna: “Bayat a kumapkapuy ti salun-atko, ad-adda a nariknak nga adda ni Jehova iti abayko. Saanak ngamin a nagsardeng nga agkararag isu a kasla ar-arakupennak. Talaga a nariknak ti talna ken saanak a nadanagan.”

Napabileg ni Valentina kadagitoy a kapadasanna ken naibagana: “Determinadoak nga agserbi iti Amatayo iti agnanayon ken agtalinaedak a matalek kenkuana aniaman ti mapasamak.”

Imbaga ni Roman a ti panangutobna iti ulidan ti panagibtur iti Biblia ken iti moderno a panawen ti nangpabileg iti pammatina. Bayat a pampanunotenna dagita nga ulidan, isalsaludsodna iti bagina: ‘Ania ti inibturanda ken apay? Ania ti nakatulong kadakuada nga agtalinaed a matalek? Kasano a tinulongan ida ni Jehova babaen ti espirituna?’ Ti sungbat dagita a saludsod ti ad-adda a nangkombinsir ken Roman nga aniaman ti pakasuotantayo, “mangted ni Jehova iti bileg a nalablabes ngem iti gagangay, no kasapulan.”

Ikararagtayo a ni Roman, Valentina, ken ti amin a patpatgentayo a kakabsat idiay Russia ket agtultuloy nga agkamang ken Jehova ken agpannuray iti bilegna.—Salmo 46:1.