Asidegen nga ipakaammo ti Blagoveshchenskiy City Court iti Amur Region ti desisionna iti kaso da Brother Aleksey Berchuk ken Dmitriy Golik. *

Aleksey Berchuk

• Nayanak: 1975 (Kartaly, Chelyabinsk Region)

• Pakasaritaanna: Maysa a karpintero ken nagtrabaho iti konstruksion. Nangrugi nga agadal iti Biblia idi 1990’s. Insardengna dagiti naranggas nga isports ken magusgustuanna itan ti makiay-ayam iti soccer kadagiti gagayyemna. Nabautisaran idi 1998. Nagkasarda ken Anna idi 2008

Dmitriy Golik

• Nayanak: 1987 (Tokhoy, Republic of Buryatia)

• Pakasaritaanna: Agtrabtrabaho kas paraipatarus. Ipatpatarusna ti Chinese iti Russian. Magusgustuanna ti ag-weight lifting, agay-ayam iti soccer, ken aggitara

  Nangrugi a nakipagadal iti Biblia ti intero a pamiliana idi 1990’s. Isu ket nabautisaran idi 2002. Idi naayaban nga agsoldado, kiniddawna a maikkan laengen iti alternatibo a serbisio a pangsibilian. Naibaon nga agtrabaho iti maysa a nursing home. Nagkasarda ken Kristina idi 2012. Madama nga agsursuroda iti English ken Chinese tapno mapalawada ti ministerioda

Idi rugrugi ti 2018, sililimed a nangikabil dagiti ahente ti gobierno iti audio ken video surveillance equipment iti balay ni Brother Golik. Idi Hunio 2018, sinerrek dagiti ahente ti Federal Security Service (FSB) ti pito a pagtaengan dagiti Saksi ni Jehova iti intero a Blagoveshchensk. Kalpasan dayta, naidarum iti kaso kriminal da Brother Dmitriy Golik ken Aleksey Berchuk. Naakusaranda a mangor-organisar iti maaw-awagan nga extremist nga aktibidad.

Saan a dagus a naibaga ken Aleksey ti pannakaidarumna iti kaso kriminal. Idi Enero 21, 2019, naaresto idiay passport control iti Domodedovo Moscow Airport. Intulod ti maysa nga imbestigador ti FSB ni Aleksey iti lugarda, ket naparitan nga agbiahe.

Imbaga dagitoy a kakabsat a napateg a saganaantayo a nasaksakbay ti pannakaidadanes. Kuna ni Dmitriy: “Nasaysayaat ti mangnamnama iti kasayaatan ngem saganaantayo latta ti pannakaidadanes. Siempre, makatulong dagiti praktikal a panagsagana ngem adayo a nasaysayaat no nakasaganaka iti naespirituan. No maidadanestayo, saan a ti kinasirib wenno ti kinalaingtayo a manglemmeng kadagiti manangidadanes ti napateg, no di ket ti kinamatalektayo iti Dios. Nagballigi met koma ni Jesus a manglemmeng kadagiti kabusorna, ngem saan a kasta ti panggepna. Kas adalanna, ti panggeptayo ket saan a mangliklik kadagiti pakarigatan, no di ket situtured nga ibturantayo dagita.”

Imbaga met ni Aleksey: “Kamali no panunotem a saan a mapasamak kenka dayta. Nalawag nga ipalpalubos ni Jehova a mapasamak daytoy. No panunotem a mabalin a maidadaneska ken maaddaanka iti positibo a kababalin, nalaklakamton nga akseptaren ken ibturan no mapasamak dayta. Ken ad-adda a makapagpannurayka iti tulong ni Jehova.”

Ammotayo a dagiti kakabsattayo idiay Russia, a pakairamanan da Aleksey, Dmitriy, ken dagiti assawada ket agtultuloy a mariknada ti kas iti kinuna ti salmista: “Kitaenyo! Ti Dios ti katulongak; ni Jehova ket adda kadagidiay mangsarsaranay kaniak.”—Salmo 54:3, 4.