Kas naipakaammo idi Pebrero 6, 2019, sinentensiaan ti Zheleznodorozhniy District Court ti Oryol ni Dennis Christensen iti innem a tawen a pannakaibalud gapu iti pannakiramanna iti natalna a panagdaydayaw. Mayap-apelar ti sentensiana iti nangatngato a korte.

Adu a pagilian ti naginteres iti pannakasentensia ni Dennis Christensen iti innem a tawen a pannakaibalud. Dagiti internasional nga organisasion kas iti Council of Europe, European Union, United States Commission on International Religious Freedom, Office of the United Nations High Commissioner for Human Rights, ken dadduma pay nga organisasion kinuestionaranda ti di nainkalintegan ken awan nakaibatayanna a pannakabista ni Dennis Christensen.

Kuna ti U.N. High Commissioner for Human Rights a ni Michelle Bachelet: “Delikado ti naulpit a sentensia ni Christensen ta maibilangton a kriminal dagiti Saksi ni Jehova iti Russia gapu iti pammatida uray no adda kalinteganda a mangannurot iti wayawaya iti relihion.” Imbagana iti gobierno ti Russia a “rebisarenda ti Federal Law on Combating Extremist Activity tapno nalawag a ti laeng naranggas nga aramid wenno aramid gapu iti gura ti maibilang nga ‘extremist nga aktibidad.’” Imbaga pay ni Ms. Bachelet kadagiti autoridad “nga ibasuradan dagiti kaso ken wayawayaandan ti amin a nakabalud gapu iti panangaramidda iti kalinteganda—wayawaya iti relihion wenno pammati, wayawaya a mangyebkas iti kapanunotan, ken wayawaya a maaddaan iti natalna a panagtataripnong.”

Dua nga aldaw kalpasan ti pannakasentensia ni Brother Christensen, adda uppat a nalatak nga eksperto a mangilablaban iti kalintegan ti tao iti Russia a nangorganisar iti press conference iti Moscow. Napno ti lugar a nakaangayanna, ken nasurok nga 6,000 ti nangbuya iti maysa nga oras a programa iti Internet. Indepensa amin dagitoy nga eksperto dagiti Saksi ni Jehova kas natalna a tattao ken saanda a pangta iti kagimongan.

Karaman met iti press conference ti asawa ni Brother Christensen a ni Irina; ti abogadona a ni Mr. Anton Bogdanov; ken ti pannakabagi ti European Association of Jehovah’s Witnesses a ni Yaroslav Sivulskiy. Nagsaoda maipapan iti di nainkalintegan a sentensia ken sinungbatanda dagiti saludsod ti media.

Uray no dandani dua a tawenen a nakabalud ni Brother Christensen, naragsak latta ken determinado nga agtalek ken Jehova. Sumagmamano nga aldaw laeng sakbay ti maudi a pannakasentensiana, imbaga ni Brother Christensen iti korte: “Rummuarto met laeng ti kinapudno, ket kastanto ti mapasamak iti daytoy a kaso.” Kalpasan ti panangbasana iti Apocalipsis 21:3-5, sititibker nga imbagana: “Dagitoy a sasao . . . iladawanda ti tiempo inton ipakat ti Dios ti hustisia ken ti pudpudno a wayawaya ti amin a tao. Adda koneksion ti wayawaya ken hustisia. Siguraduento ti Dios a matungpal amin dagitoy.”

Bayat nga ur-urayen ni Brother Christensen ti pannakayapelar ti sentensiana, masapul a maibalud iti Detention Facility No. 1 iti Oryol Region​—a nakaibaludanna iti napalabas a 20 a bulan.