Idi Pebrero 25, 2019, nagpatulong iti European Court of Human Rights (ECHR) dagiti abogado ni Brother Sergey Loginov, maysa kadagiti pito a kakabsat a pinarparigat dagiti opisial iti Surgut a siudad iti makinlaud a Siberia. Nawayawayaanen ti innem a kakabsat a naparparigat, ngem nakabalud pay laeng ni Brother Loginov manipud idi naaresto ken saan a naagasan dagiti sugatna.

Idi Pebrero 26, maysa nga aldaw laeng kalpasan a nayuli ti darum, dagus a nagdesision ti ECHR iti pabor kadatayo. Pinatgan ti Korte ti kiddawtayo ket binilinna ti Russia nga ipanda a “dagus” ni Brother Loginov kadagiti doktor tapno makita no kasano kakaro ti pannakadangranna iti “pisikal ken mental” ken no ipalubos ti salun-atna nga agtultuloy a maibalud. Naikkan ti Russia iti pawayway nga agtulnog iti bilin agingga inton Marso 11, 2019.

Patgan laeng ti ECHR dagiti kasta a kiddaw no naidumduma ti kaso, kas koma no agpeggad ti biag ti maysa no awan ti maaramid nga addang. Isu a makaparegta a maammuan a nagtignay a dagus ti ECHR—maysa nga aldaw laeng kalpasan a nayuli ti darum. Imbaga ti ECHR nga imonitorna ti panangabuso a mapaspasaran dagiti kakabsattayo.

Iti agdama, 19 a Saksi ti naidarum iti kaso kriminal iti Surgut, ken nakabalud ti 3 kadakuada.

Bayat nga itultuloytayo nga ikararagan dagiti kakabsattayo, laglagipentayo ti makaparegta a sasao ni Jeremias: “Mabendisionan ti tao nga agtalek ken Jehova, a mangin-inanama ken Jehova.”—Jeremias 17:7.