Idi Huebes, Mayo 16, 2019, naituloy a nadengngeg ti apelar ni Dennis Christensen. Imbaga dagiti abogado iti agsumbangir a dasig ti maudi nga argumentoda, ken dandani maysa nga oras a nagsao ni Dennis tapno idepensana ti bagina. Adda manen sadiay dagiti diplomat manipud iti sabali a pagilian ken dagiti journalist. Makaparegta daytoy ta uray no dua a tawenen ti napalabas manipud idi naipadamag iti intero a lubong ti pannakaaresto ni Dennis, interesado latta unay dagiti tattao iti kasona.

Nayeskediul idi a malpas ti pannakadengngeg ti kasona iti Biernes, Mayo 17. Ngem impakaammo dagiti hues a maituloy dayta inton Huebes, Mayo 23 iti 10:00 ti bigat. Maikkan ni Dennis iti maudi a gundaway nga agapelar sakbay a mangaramid dagiti hues iti pinal a desision. Saan a masigurado no maipakaammon ti desision inton Mayo 23, wenno mangyeskediul ti korte iti sabali a petsa.

Maparparegtatayo no makitkitatayo dagiti kakabsattayo a da Dennis Christensen ken Sergey Skrynnikov nga agtultuloy a positibo ken ikagkagumaanda ti agtalinaed a matalek. Marikriknatayo met kadagiti kakabsattayo idiay Russia ti kas iti narikna ni apostol Pablo kadagiti taga-Tesalonica idi insuratna: “Ipagpannakkeldakayo kadagiti kongregasion ti Dios gapu iti panagibtur ken pammatiyo iti amin a pannakaidadanes ken rigat a sagsagabaenyo.”—2 Tesalonica 1:4.