Idi Abril 1, 2019, sinentensiaan ti korte ti Russia ti 56 ti tawenna a ni Sergey Skrynnikov gapu ta isu ket maysa a Saksi ni Jehova. Imbilin ti korte nga agmulta iti dakkel—$5,348.00 (agarup PHP 278,000). Kayat ti prosekusion nga isu ket maibalud iti tallo a tawen ngem saan a pinatgan ti korte. Dayta met la a korte ti nangsentensia ken Brother Dennis Christensen a maibalud iti innem a tawen.

Adda maysa nga anak a babai da Brother Skrynnikov ken ti asawana a ni Nina. Tultulonganda ti anakda ken ti manugangda a mangpadakkel iti lima nga annakda. Ti agassawa nga Skrynnikov ti kangrunaan met a mangay-aywan kadagiti nataenganen a nagannak ni Nina.

Iti korte, indepensa ni Brother Skrynnikov ti pammatina iti nadayaw ken makakombinsir a pamay-an. Daytoy ti dadduma kadagiti imbagana: “No kitaenyo ti agdama a kasasaadko kas iti panangmatmat ti awan pammatina iti Dios, mabalin a maupaykayo. . . . Ngem kas Saksi ni Jehova, positiboak gapu iti pammatik. No ipalubos ti Dios a maibaludak iti tallo a tawen, diak ibilang dayta kas pannusa no di ket kas espesial nga asaynment a panagserbik iti baro a lugar! Isu a saanak a maupay. . . . Maymaysa ti Dios ken matulongannakami siwayawayakami man wenno nakabalud. Dinakami baybay-an. Kaduami isuna sadinoman ti ayanmi basta agtalinaedkami a matalek kenkuana.”

Maparegtatayo iti nabileg a pammati dagiti kapammatiantayo a kas ken Brother Skrynnikov. No panunotentayo dagiti mapaspasaranda a nakaro a suot, maibagatayo met ti inkararag ni apostol Pablo: “Sapay koma ta ti Dios a mangted iti namnama punnuennakayo iti kasta unay a ragsak ken talna gapu ta nagtalekkayo kenkuana, tapno dumakkel ti namnamayo babaen ti pannakabalin ti nasantuan nga espiritu.”—Roma 15:13.