HULIO 10, 2023
RUSSIA

Nasentensiaan ti Tallo a Kakabsat a Babbai iti Komsomolsk-on-Amur

I-PLAY

Idi Marso 23, 2023, ti Centralniy District Court iti Komsomolsk-on-Amur sinentensiaanna da Sister Tatyana Bondarenko, Yelena Nesterova, ken Tatyana Svoboda iti lima a tawen a suspended prison sentence. Kayatna a sawen a saanda pay a maibalud bayat dayta a tiempo.

Maipapan Kadakuada

Tatyana Bondarenko

Nayanak: 1960 (Komsomolsk-on-Amur, Khabarovsk Territory)

Pakasaritaan: Nagtrabaho kas operator iti milling machine ken kalpasanna kas maysa a housekeeper

Nakiasawa ken Vladimir idi 1992. Tallo ti annakda a lallaki

Nakipagadal iti Biblia idi naammuanna ti panggep ti Dios para iti sangatauan ken ti karina a paraiso a daga. Nabautisaran idi 2005

Personal a Komento

Kasanom a narikna ti tulong ni Jehova bayat daytoy nagrigat a tiempo?

Saan a Saksi ni Jehova ni lakayko, ket adda idiay ospital idi sinukisok ti autoridad ti balaymi. Tinawagannak iti dayta nga aldaw tapno ibagana a pinalubosanen dagiti doktor nga agawid. Ngem dinak nakontak ta kinumpiskar ti autoridad ti selponko. Karabiyanna, kalpasan ti imbestigasion, gimmatangak iti baro a selponko isu nga idi laeng a natawagak ni lakayko ken inlawlawagko ti napasamak. Madandanagankami idi. Ngem inkararagko ken Apo Jehova a pagkalmaennak, ket sinungbatannak. Idi nakaawidkamin ken lakayko iti dayta a rabii, naasian unay kaniak ket tinulongannak a nangyurnos kadagiti gamit iti balaymi kalpasan ti panagsukisok ti autoridad. Gapu iti napadasanmi, nanayonan pay ti panagtalekko ken Apo Jehova.

Yelena Nesterova

Nayanak: 1967 (Komsomolsk-on-Amur)

Pakasaritaan: Nagtrabaho kas accountant

Babbai ti dua nga annakna, natay ti maysa idi 1998

Naam-ammona dagiti Saksi ni Jehova idi nangala iti abogado a maysa a Saksi. Nagustuanna ti panagbalinda a napudno ken ti panangusarda iti Biblia a mangsungbat kadagiti saludsodna. Nabautisaran idi 1997

Personal a Komento

Ania ti nasursurom iti narigat a kapadasam?

Napaneknekak a talaga a pagimbagantayo no surotentayo dagiti balakad maipapan iti panagbalin a natulnog. Kalpasan la unay a naakusaranak kas kriminal, imbaga ti maysa a brother a masapul nga isaganakon ti final statement-ko iti korte. Ngem napanunotko, ‘Di pay met nangrugi ti pannakabistak.’ Sakonto la ngamin basaen ti final statement-ko inton agleppas ti bistak. Ngem idi inkararagko dayta, sinurotko ti imbaga ti brother ket insuratko ti kayatko nga ibaga. Nagpartak ti pannakabistak. Imbag laengen ta nagsaganaak a nasaksakbay isu a nailawlawagko a naimbag dagiti patpatiek iti korte. Talaga a nagimbagak ti panagtulnogko iti balakad dagiti brother uray no saanko idi a maawatan ti rason.

Ikararagtayo ken Jehova nga itultuloyna a bendisionan ken pabilgen dagitoy a matalek a kakabsattayo a babbai bayat a maipaspasangoda iti pakasuotan.—Ruth 2:12.

Time Line

Septiembre 21, 2021

Narugian a maipila ti kaso kriminal maibusor ken Tatyana Svoboda
Oktubre 18, 2021

Rinugian met ti autoridad nga imbestigaran da Tatyana Bondarenko ken Yelena Nesterova
Oktubre 20, 2021

Sinukisok ti autoridad ti balbalayda
Agosto 28, 2022

Naidarumda
Disiembre 28, 2022

Nangrugi ti pannakabistada
Marso 23, 2023

Nasentensiaan ken naikkanda iti lima a tawen a suspended prison sentence

Kitaem Met

DAMDAMAG

Naibalud Gapu iti Pammatida—Russia

Maibalbalud dagiti Saksi ni Jehova idiay Russia gapu iti pammatida. Ammuem ti pakasaritaanda, ken i-download-mo ti listaan dagiti agdama a nakabalud a Saksi.

DAMDAMAG