Natalged a nakasangpet ni Dennis Christensen idiay Denmark idi Mayo 25, 2022. Nawayawayaan manipud iti pagbaludan iti Russia maysa nga aldaw sakbayna, ken dagus a nai-deport. Lima a tawen a naibalud iti nagduduma a pagbaludan.

“Maragragsakanak unay ta nawayawayaanakon ken kaduakon ti ipatpategko nga asawa a ni Irina,” kuna ni Dennis. “Ti suporta ken pammaregta dagiti kakabsat iti intero a lubong ket regalo ni Jehova. Agtultuloy nga ikarkararagak dagiti natutured a kakabsattayo a maidaddadanes ken maibalbalud gapu iti pammatida.”

Da Dennis ken Irina ket supsuportaran dagiti gagayyem ken kapamiliada iti naespirituan ken iti material. “Eksaytedkamin a makikadua kadagiti kakabsat iti Denmark a siwawayawaya nga agdaydayaw ken Jehova,” imbaga da Dennis ken Irina.

Naaresto ken naibalud ni Dennis idi Mayo 25, 2017, idi sinerrek dagiti armado ken nakamaskara nga autoridad ti Russia ti gimong ti kongregasionna idiay Oryol. Nasentensiaan a mangor-organisar iti aktibidad ti maysa a narelihiosuan nga organisasion a naibilang kas extremist ken imparit ti Korte Suprema ti Russia makabulan sakbayna.

Maulit-ulit nga imbaga dagiti autoridad ti Russia a ti pannakaiparit idi 2017 ket para laeng kadagiti legal a korporasion dagiti Saksi ni Jehova ken saanda kano a biangan ti kalintegan ti indibidual a Saksi nga agdaydayaw. Ngem ti pannakaibalud ni Dennis ti rugi ti agresibo a panangaresto ken panangibalud kadagiti adu a Saksi ni Jehova iti intero a Russia ken Crimea.

Agingga ita, adda pay 91 a kakabsattayo a nakabalud. Ikararagtayo nga agtultuloy a suportaran ni Jehova dagitoy a matalek a kakabsattayo ken ‘tratuenna ida iti espesial’ a pamay-an.—Salmo 4:3.