Idi Huebes, Hulio 4, 2019, inyanunsio ti Ordzhonikidzevskiy District Court iti Perm, Russia ti desisionna a nakabasol ni Brother Aleksandr Solovyev ken pinagmultana iti 300,000 a ruble ($4,731 U.S.).

Naaresto ni Brother Solovyev idi rabii ti Mayo 22, 2018, iti maysa nga estasion ti tren bayat ti panagawidna manipud iti sabali a pagilian a kadua ti baketna a ni Anna. Pinosasan dagiti polis ni Brother Solovyev sa imbaludda iti temporary detention center. Innala met dagiti polis uray ni Sister Solovyev ngem insakayda iti sabali a lugan. Agpatnag nga ininspeksion dagiti polis ti apartmentda, ket innalada dagiti retrato, elektroniko nga alikamen, ken dagiti Bibliada.

Kalpasan ti interogasion, nawayawayaan ni Sister Solovyev ken saan a nakasuan. Ngem nakasuan iti krimen ni Brother Solovyev, ket idi Mayo 24, naipupok iti maysa a balay agingga idi Nobiembre 19, 2018. Bayat nga ur-urayenna ti pannakabistana, linimitaran dagiti autoridad ti mabalinna nga aramiden ken papanan.

Iyapelar dagiti abogado ni Brother Solovyev ti desision ti korte. Kiniddawda met iti United Nations Working Group Against Arbitrary Detention a repasuenda ti kaso.

Bayat a kumarkaro ti ibubusor kadagiti lugar a kas iti Russia, ‘awan a pulos ti pagbutngantayo.’ Agtalektayo nga agtultuloy nga ited ni Jehova ti kasapulantayo tapno makapagibturtayo agingga a dumteng ti dakkel nga aldaw ti panangisalakanna.—Filipos 1:28