Inton Pebrero 1, 2021, * ipakaammo ti Birobidzhan District Court of the Jewish Autonomous Region ti desisionna iti kaso ni Brother Igor Tsarev. Mabalin a maibalud iti uppat a tawen.

Igor Tsarev

• Nayanak: 1974 (Birakan, Jewish Autonomous Region)

• Pakasaritaanna: Adda dua nga adingna a babbai. Idi ages-eskuela pay laeng, nagtrabaho kas parapukan iti kayo, karpintero, ken electrician tapno matulonganna ti pamiliana. Magusgustuanna ti agkalap ken agpaliiw iti natural a buya ti aglawlaw

• Idi agserserbi pay laeng kas soldado, pinampanunotna no ania ti kaipapanan ti biag. Dayta ti nangtignay kadakuada ken tatangna nga agadal iti Biblia. Nabautisaran idi 1997. Nagkasarda ken Viktoriya idi 1998. Adda balasitang nga anakda

Indarum dagiti agtuturay iti Russia ni Brother Igor Tsarev idi Hulio 30, 2019. Naakusaran nga agad-adal iti Biblia “tapno iwarasna ti pannursuro dagiti Saksi ni Jehova.” Nausar kas ebidensia maibusor ken Igor dagiti video dagiti gimong a sililimed nga inrekord dagiti tao ti Federal Security Service (FSB). Saan a kas iti gagangay a panagbista, kiniddaw ti prosecutor a saan a mapalubosan ti publiko a dumngeg. Sigun iti prosecutor, ti napatgan a kiddawna ket kasapulan tapno saan a maimpluensiaan dagiti dumngeg kadagiti patpatien ni Igor.

Imbaga ni Igor: “Mabiiten nga agbaliw ti biagko gapu iti desision ti korte. Ti agpayso, nagbaliwen. Naikabilak iti recognizance agreement isu a saanak a makabiahe. Iti pagtrabahuak, napilitanak a mangilawlawag iti boss-ko no apay nga im-imbestigarandak dagiti polis. Masmasdaaw ti boss-ko ken dagiti katrabahuak no apay a kastoy ti pannakatratok, ngem nabayagen nga ammoda a maparparigat dagiti Kristiano.”

Iramantayo iti kararagtayo ni Igor ken ti pamiliana. Amotayo a ‘pabilgen ida ni Jehova babaen ti espirituna.’—Efeso 3:16.