Kalpasan ti agarup lima a tawen a pannakaibalud ni Brother Sergey Klimov, nawayawayaan iti maysa a pagbaludan idiay Russia iti siudad ti Astrakhan idi Hulio 26, 2023. Naaresto idi Hunio 3, 2018, ken naibalud bayat nga ur-urayenna ti pannakabistana. Idi Nobiembre 5, 2019, nasentensiaan ket naipan iti maysa a pagbaludan.

Bayat a nakabalud, saan a napalubosan ni Sergey a makita ni baketna a Yuliya iti agarup siam a bulan. Saanna met a naawat ti kaaduan kadagiti surat a naipatulod kenkuana. Nagsakit ni Sergey iti nakaro gapu iti saan a nasayaat a situasion iti pagbaludan. Ngem uray no kasta, nagtalinaed a positibo ni Sergey gapu ta intultuloyna ti naespirituan a rutinana iti panagkararag ken panagbasa iti Biblia.

Inakusaran dagiti autoridad ni Sergey iti extremism gapu kadagiti narelihiosuan a patpatienna. Ngem bayat ti pannakabista ni Sergey, situtured a pinaneknekanna nga ulbod ti akusasionda kenkuana ken inlawlawagna no apay nga iranranudna ti mensahe ti Biblia iti dadduma: “Ti Diosko a ni Jehova ket Dios ti ayat ken hustisia.” Innayonna: “Ayat ti mangtigtignay kaniak a tumulong iti dadduma, saan a gura wenno extremism.”

Makipagragsaktayo kada Sergey ken Yuliya ta agkaduada manen. Ket agyamyamantayo ta binendisionan ni Jehova ti determinasion ni Sergey nga agtalinaed a matalek.—Josue 24:14.