Idi Hulio 2, 2019, nagdesision ti korte idiay Krasnoyarsk, Russia, a mayawayaan ni Brother Andrey Stupnikov iti pannakaipupokna iti maysa a balay (house arrest). Nupay kasta, agtultuloy latta ti panagimbestigar kenkuana dagiti autoridad.

Idi Hulio 3, 2018, agur-uray ti agassawa nga Stupnikov iti Krasnoyarsk International Airport para iti nasapa a biaheda. Inasitgan ida ti dua nga agent ti Federal Security Service ken inarestoda ni Brother Stupnikov. Walo a bulan a naibalud sakbay a nabista sa nayakar iti maysa a balay iti agtapus ti Pebrero 2019.

Sigun ken Brother Stupnikov, adu ti nasursurona maipapan iti bagina ken iti relasionna ken Jehova iti naglabas a tawen. Kinunana: “Nabayagkamin a Saksi ken Olga, ngem ita laeng a nagbalin a kastoy kadekket ti relasionmi ken Jehova! Iti karirigatan a tiempo, nariknak, ken agtultuloy a marikriknak, ti kaadda ken suporta ti Amatayo. Masmasdaawak ta nakasingsinged kaniak ti Dios ken dagus a sungsungbatanna dagiti kararagko!”

Intuloy ni Brother Stupnikov: “Ad-adda a kombinsidoak itan nga ammo ken maawatan ni Ama Jehova ti marikriknak. Tinulongannak daytoy a kapadasak a naan-anay nga agtalek kenkuana ken saanko unay a pagdanagan ti pannakaidadanes. Ad-adda a nakabutbuteng no mapukawko ti nadekket a relasionko ken Jehova. Kombinsidoak nga iti tulongna, mapagballigiantayo ti amin.”

Idi Hulio 1, immabuten iti 217 ti bilang dagiti kakabsat idiay Russia a nakasuan ken umad-adu pay. Adda met sumagmamano a gundaway a kissayan dagiti autoridad iti Russia ti dusa nga ipatpatawda iti dadduma a kakabsat. Nupay kasta, saan a dagiti natauan a korte wenno dagiti opisial ti pagtalkantayo, imbes ketdi, ni Jehova ti pagtalkantayo. Ikararagtayo nga agtultuloy a patibkeren ken protektaran ni Jehova ti amin a kakabsattayo idiay Russia.—Salmo 28:7.