Asidegen * nga ipakaammo ti Gornomariyskiy District Court iti Republic of Mari El ti desisionna iti kaso ni Sister Yekaterina Pegasheva.

Yekaterina Pegasheva

• Nayanak: 1989 (Gaintsy, Kirov Region)

• Pakasaritaanna: Maymaysa nga anak. Magusgustuanna ti agbasa kadagiti libro, agputar kadagiti daniw, ken agkanta. Agtrabtrabaho kas paradalus iti balay. Nagsursuro iti lengguahe a Mari tapno mapalawana ti ministeriona

Idi Oktubre 3, 2019, naaresto ni Sister Pegasheva idiay Yoshkar-Ola, a kabesera ti Republic of Mari El. Sinerrek dagiti polis ti balayna ket innalada dagiti libro, gadyet, personal a surat, ken dokumentona. Naidarum ni Yekaterina gapu ta makiramraman kadagiti aktibidad ti maiparit nga organisasion ken makisarsarita kadagiti kapammatianna maipapan iti Biblia.

Imbaga ni Yekaterina: “Idi addaak iti kalsada, bigla nga inasitgandak dagiti polis ket impidegdak iti kayo sa tinengngelda dagiti imak iti likudko. Kas ken Nehemias, nagkararagak iti apagbiit tapno tulongannak ni Jehova.” Kalpasan ti pannakaarestona, nasurok a 100 nga aldaw a nagyan iti pretrial detention. Iti agdama, isu ket nakabalud iti balayna.

Namin-adu a napalutpot ni Yekaterina bayat nga adda iti pretrial detention. Nakatulong kenkuana dagiti naadalna iti Biblia. Imbagana: “Nalagipko ti pannakasanay ken dagiti asaynmentko idi nageskuelaak iti School for Kingdom Evangelizers. Adda maysa a nangnangruna a nangpatibker kaniak: No sumungbatka kadagiti kabusor bayat ti interogasion, buybuyaennaka ni Apo Jesus. Nakatulong kaniak daytoy tapno makapagteppelak ken maipakitak ti respeto kadagiti agtuturay a di nainkalintegan a mangak-akusar kaniak.”

Saan a nalaka ken Yekaterina ti pannakaibaludna iti pretrial detention ken iti balayna iti nasuroken a makatawen. Kimmapuy ti salun-atna ken saan a makapagtrabaho iti sekular. Nakarigrigat met ti pannakayadayona ken ni nanangna ken iti lolana. Iti laksid dagitoy a pannubok, determinado ni Yekaterina nga agtalinaed a matalek. Imbagana: “Bayat nga ad-adda a parparigatendak, ad-adda met nga isuotko ti naespirituan a kabal. Saanak itan a mabuteng iti aniaman! Naturedak idin. Ngem ita, babaen ti tulong ti espiritu ti Dios, naturturedak manen.”

Bayat nga ur-urayen ni Yekaterina ti sentensiana, ammotayo nga itultuloyna ti agpannuray ken Jehova, a mangpabpabileg kadagiti amin nga adipenna.—Exodo 15:2.