Ita nga aldaw, inrugi ti Supreme Court ti Russian Federation a repasuen ti 43 a volume dagiti dokumento maipapan iti kaso. Napalubosan met dagiti abogado ti Administrative Center (Center) a mangidatag kadagiti kabbaro nga ebidensia iti pannaka-raid dagiti panaggigimong dagiti Saksi ni Jehova. Idi Marso ken Abril 2017, sinerrek dagiti ahensia ti gobierno a mangipatpatungpal iti linteg dagitoy a panaggigimong ken impangtada nga maidarum iti kriminal a kaso dagiti immatender.

Kas panangikabilangan iti kiddaw ti Ministry of Justice (Ministry) a mapasardeng ti agdama a 395 a legal nga organisasion (Local Religious Organizations wenno LRO), dinengngeg ti Korte ti maipapan iti legal a panagandar ken estruktura ti organisasion dagiti Saksi ni Jehova. Idi rinepaso ti Korte dagiti napalabas a desision ti pannakaipaserra ti walo nga LRO, inlawlawag dagiti abogado dagiti Saksi a naimbento laeng dagiti ebidensia ken saan a nagna iti umiso a proseso.

Kanayonanna, impaganetget dagiti abogado ti Center a saan a maymaysa ti pagannurotan a sinurot ti Ministry. Idi nadengngeg ti kaso maipapan iti pannakaipaserra dagiti LRO, imbaga ti Ministry nga awan ti koneksion ti Center kadagiti aktibidad dagiti LRO. Imparitna met ti pannakiraman ti Center kadagiti pannakadengngeg ti kaso. Ngem iti agdama a kaso, ibagbagan ti Ministry a ti Center ti manungsungbat kadagiti aktibidad dagiti LRO ken ti “extremism” a linaon dagiti publikasion dagiti Saksi.

Nagadu ti inaramid ti Ministry a panaginspeksion kadagiti legal nga organisasion dagiti Saksi ken insubmitirda iti Korte ti adu a report maipapan iti inspeksion. Ngem idi napagsaludsodan, awan ti maibaga ti Ministry uray maysa nga aktibidad dagiti Saksi a konektado iti extremism.

Maituloyto ti panagdengngeg inton Abril 20, 2017, iti 2:00 p.m.