Sipud idi imparit ti Korte Suprema ti Russia ti panagdaydayaw dagiti Saksi ni Jehova idi Abril 20, 2017, agtultuloy a mabusbusor ken maibalbalud dagiti kakabsat. Kinompiskar met dagiti autoridad ti 131 a sanikua dagiti Saksi ni Jehova. Adda pay 60 a sanikua nga agngangabit a makompiskar. Natantia nga agdagup iti nasurok a $57 million ti gatad dagita.

Ti sangay iti Russia idiay Solnechnoye a kukua ti Watch Tower Bible and Tract Society of Pennsylvania ti maysa kadagiti nakompiskar. (Kitaen ti ladawan iti makinngato a kannigid.) Aggatad dayta iti agarup $30 million. Ti 43 kadagiti sanikua a nakompiskar ket kukua dagiti legal nga institusion iti Austria, Denmark, Finland, Netherlands, Norway, Portugal, Spain, Sweden, ken United States. Illegal ti panangkompiskarda, gapu ta ti desision ti Korte Suprema mainaig iti pannakaiparit dagiti Saksi ni Jehova ket saan a mangted iti gobierno iti legal a kalintegan a mangkompiskar kadagiti sanikua a kukua ti sabali a pagilian.

Kiniddaw dagiti Saksi ni Jehova iti European Court of Human Rights (ECHR) nga imbestigaranda ti illegal a pannakakompiskar ti dati a sangay iti Russia. Aniaman ti desision ti ECHR, agtalektayo ken Jehova. Ikararagtayo nga agtultuloy ti kinatured dagiti kakabsattayo idiay Russia ken saanda nga ipalubos a dagiti puersado a panangserrek, panangaresto, ken panangkompiskar kadagiti lugar a pagdaydayawan ti mangpasardeng kadakuada nga agdayaw ken Jehova “maitunos iti espiritu ken kinapudno.”—Juan 4:23