Ti Metallurgichesky District Court of Chelyabinsk asidegen nga ipakaammona ti desisionna iti kaso ni Sister Valentina Suvorova. * Saan pay nga imbaga ti prosecutor ti kayatna a sentensia ni Sister Valentina.

Valentina Suvorova

• Nayanak: 1948 (Sorovskoye, Kurgan Region)

• Pakasaritaanna: Nagretiro kalpasan ti nasurok a 30 a tawen a panangisurona idiay Chelyabinsk Music School. Magusgustuanna ti agmula, agsala, ken dumngeg iti musika

  Nagkasarda ken Vladimir idi 1973. Natay ti anakda a ni Igor gapu iti kanser sumagmamano a tawen ti napalabasen. Nabiit pay a natay ti nanangna ken ti kabsatna a babai

Idi Marso 26, 2019, sinerrek dagiti armado a polis ti nasurok a 20 a pagtaengan dagiti kakabsattayo idiay Chelyabinsk ken Yemanzhelinsk. Kalpasan ti napaut nga imbestigasion, ni Valentina nga agtawen itan iti 73, ket naidarum iti kaso kriminal idi Disiembre 5, 2019, gapu iti panagbasana iti Biblia ken panangiranudna iti pammatina kadagiti sabsabali. Naparitan nga agbiahe ita. Naidarum met ni Vladimir iti kaso kriminal gapu kadagiti Nakristianuan a patpatienna.

Nalagipna ti napasamak idi sinerrek dagiti armado a polis ti balayda bayat a matmaturogda: “Saankami a makadiram-os, makasagaysay, wenno makasukat iti bado. Sinukimatda ti amin a suli ti balaymi, ti amin a kabinet, jewelry box, pitaka, ken bulsa. . . . Linuktanda dagiti kaldero ken kinitada amin a likud ti kortina ken pagiddaanmi. Talaga a sinukimatda amin.”

Gapu ta baket ken nakapuyen ti salun-at ni Valentina, madanagan no ania ti mabalin nga epekto kenkuana ti pannakaidadanes.

Imbaga ni Valentina a ti regular a personal a panagadalna iti Biblia ti mangpatpatibker kenkuana iti naespirituan. Kunana: “Ti panangbasa, panangutob, ken panangyaplikarko iti inaldaw a teksto ti nakatulong kaniak a mangibtur kadagiti pakarigatan.”

Imbaga pay ni Valentina a tapno maibturantayo dagiti narigat a kasasaad, napateg ti panagsagana ken itatabuno kadagiti gimong, personal a panagadal, ken panagdaydayaw ti pamilia. Kunana nga adda baro a masursurona iti tunggal gimong nga ikagkagumaanna nga iyaplikar. Ken makatulong ti napasnek a panagkararag tapno mabang-aran. Imbagana a “kanayon nga agyamyaman iti Dios gapu iti tulongna.”

Agtultuloy met a palpalagipan ni Valentina ti bagina ken ti sabsabali: “Awan ti aniaman a pagbutngantayo. Agtalinaedtayo a natibker ken nabileg iti pammati, ken laglagipentayo ti Mateo 6:33 ken 2 Corinto 1:3, 4.”

Nalawag a dagiti kakabsattayo idiay Russia, a pakairamanan da Valentina ken Vladimir, ket pammaneknek nga agpayso ti mabasa iti Salmo 64:10: “Agragsakto ti nalinteg gapu ken Jehova ket agkamangto kenkuana; nakaragragsakto ti amin a nalinteg ti panagpuspusona.”