UPDATE: Inyakar ti Vyborg City Court ti pannakadengngeg ti kaso inton Agosto 9, 2017.

Inton Hulio 28, 2017, ituloy ti Vyborg City Court a denggen ti kaso maipanggep iti pannakaibilang nga “extremist” ti Baro a Lubong a Patarus ti Nasantuan a Kasuratan, nga impablaak dagiti Saksi ni Jehova iti lengguahe a Russian. Temporario a naisardeng ti pannakadengngeg ti kaso sipud idi Abril 2016 kalpasan a pinatgan ti hues ti kiddaw ti prosekiutor ti Leningrad-Finlyandskiy Transport nga adda maaramid nga “eksperto a panagadal” tapno makita no talaga a maibilang ti Baro a Lubong a Patarus kas “extremist.”

Kalpasan ti namin-adu a pannakaitantan, nakompleto ti panagadal ket naisubmitir iti korte idi Hunio 22, 2017. Kas iti ninamnama dagiti Saksi, sinuportaran ti panagadal ti pannakaibilang daytoy a Biblia kas “extremist” a publikasion. Sigun iti dayta a panagadal, ti Baro a Lubong a Patarus ket “saan a Biblia.” Nupay kasta, maysa dayta a pamay-an tapno malusotanda ti Law on Counteracting Extremist Activity, a saan a mangipalubos a maibilang nga extremist dagiti sagrado a sursurat, kas iti Biblia. Maysa pay, ti konklusion ti “eksperto a panagadal” ket naibatay iti patpatien ti relihion. Dagiti nangaramid iti “eksperto a panagadal” ket kontra iti panangipatarus ti Baro a Lubong a Patarus iti Tetragrammaton * kas “Jehova” ken ibagbagada a nasuktan kano ti linaon dayta tapno umayon iti doktrina dagiti Saksi.