Nasuroken a 525 nga aldaw ti kaadda ni Brother Dennis Christensen iti pagbaludan gapu iti pammatina ken dandani 50 a daras a naisaklang iti korte. Nangyeskediul ti Zheleznodorozhniy District Court iti Oryol, Russia, a mangus-usig iti kaso ni Dennis, kadagiti pannakadengngeg ti kasona agingga iti ngalay ti Disiembre. Nupay nasuroken a 18 a bulan a nakabalud ni Dennis, positibo latta ti kababalinna. Awan duadua a tultulongan ni Jehova, kas sungbat dagiti kararag ti minilion a kakabsattayo iti intero a lubong.

Nakaawat ni Dennis iti ginasut a kard ken drowing manipud kadagiti padana a Saksi iti Russia ken iti dadduma a pagilian a mangay-ayat ken mangsupsuporta kenkuana. Idi nadengngeg ti kasona idi Oktubre 30, impakita ni Dennis dagiti kard ken ladawan nga impatulod kenkuana dagiti ubbing iti sarming ti detention booth-na tapno maparegta dagiti napan nangsuporta kenkuana.

Malaksid iti sangalubongan a panagkakabsattayo, naginteres met ti dadduma a pagilian iti lubong iti kaso ni Dennis. Idi Hulio 21, 2017, indeklara ti Memorial Human Rights Centre iti Moscow a ni Dennis ket naibalud gapu iti politika. Idi Hunio 20, 2018, kiniddaw ti Russia’s Human Rights Council iti Prosecutor General’s Office a kitaenda no nainkalintegan a maibalud dagiti Saksi gapu iti pammatida. Idi Septiembre 26, 2018, ti United States Commission on International Religious Freedom pormal nga inlistana ni Dennis kas “balud gapu iti relihion ken konsiensiana.”

Publiko nga imbaga ti Russia iti korte a ti pannakaiparit dagiti legal a korporasion dagiti Saksi ni Jehova saanna nga apektaran ti kalintegan dagiti Saksi kas indibidual a mangalagad iti pammatida. Saan a tinungpal dayta dagiti polis ken ti dadduma pay nga opisial ken kinilloda ti linteg tapno maarestoda ni Dennis ken ti dadduma pay a Saksi ken pinabasolda ida kas “extremist.” Iti daytoy a tawen, namin-adu a rimmaut ti Russia iti intero a Federation. Iti agdama, 25 a kakabsat ti nakabalud, 18 ti nakabalud iti pagtaenganda, ken nasurok nga 40 ti addaan iti nagduduma a restriksion. Ti resulta ti pannakabista ni Dennis ti mangipakita no anianto ti mapasamak iti nasurok a 90 a dadduma pay a Saksi ni Jehova iti agarup 30 a rehion iti Russia, nga agur-uray iti resulta ti pannakaimbestigar ti kasoda.

Ammotayo a ti kakabsattayo iti intero a lubong itultuloyda nga ikararag nga agtultuloy a pabilgen ken patibkeren ni Jehova dagiti patpatgentayo a kakabsat a maipaspasango iti kaso kriminal gapu ti pammatida, bayat a sigagagar nga ur-urayentayo ti aldaw inton ‘itedna ti hustisia’ kadakuada.—Lucas 18:7.