ABRIL 21, 2017
RUSSIA
Imbilang ti Supreme Court nga Illegal ti Aktibidad Dagiti Saksi ni Jehova Idiay Russia
Idi Abril 20, 2017, iti laksid ti panangkritikar ti intero a lubong, nagdesision ti Korte Suprema ti Russia nga illegal ti aktibidad dagiti Saksi ni Jehova idiay Russia. Pinaboran ni Judge Yuriy Grigoryevich Ivanenko iti Supreme Court ti kaso nga impila ti Ministry of Justice a “maiserra ti ‘Administrative Center dagiti Saksi ni Jehova iti Russia’ ken dagiti local religious organization a paset ti estrukturana [ken] maited iti Russian Federation ti amin a sanikua ti naipaserra a relihion.”
Imbaga pay ni Judge Ivanenko a maipatungpal a dagus ti desision a mangpasardeng iti amin nga aktibidad dagiti Saksi iti intero a Russia. Uray no agapelar dagiti Saksi ni Jehova iti Appellate Chamber of the Supreme Court, maipatungpal a dagus ti desision a mangpasardeng iti panagdaydayawda.
Dagiti Abogado ti Administrative Center
Nai-deport ni Vasiliy Kalin idiay Siberia ken ti pamiliana idi agtawen iti uppat gapu iti pammatida kas Saksi ni Jehova. Kunana: “Idi imbaga ti hues ti desision, bigla a nagbaliw ti biag dagiti Saksi ni Jehova iti Russia, kas indibidual ken kas pamilia. Mabalin a maibilangdan a kriminal ken maibalud gapu laeng iti pammatida.”
Kuna ni Philip Brumley, General Counsel para kadagiti Saksi ni Jehova: “Nadismayakami a permi iti desision ita nga aldaw. Maysa laeng ti talaga a pampaneknekan ti pannakadengngeg ti kaso ken dagiti ebidensia—saan a pulos a nakiraman ti Administrative Center iti aniaman nga aktibidad a maibilang nga extremist. Agapelarkami.”