Idi Abril 12, 2017, intuloy ti Korte Suprema ti maikapat nga aldaw a panangdengngeg iti kaso ti pannakaiparit dagiti Saksi ni Jehova idiay Russia. Nangidatag dagiti abogado ti Administrative Center dagiti Saksi ni Jehova kadagiti argumento a ti pammabasol ti Ministry of Justice ket maikontra iti internasional a katulagan ti Russia ken iti mismo a konstitusionna.

Imbaga dagiti abogado a ti plano ti Ministry of Justice a panangiparit kadagiti Saksi ket maikontra kadagiti internasional a linteg, iti European Convention ken iti International Covenant on Civil and Political Rights. Ipalubos dagita a tulagan, ken uray ti konstitusion ti Russia, ti wayawaya ti konsiensia ken relihion, wayawaya a mangyebkas iti rikrikna, wayawaya nga aguummong, ken wayawaya nga agkakadua (ti kalintegan a mangbukel iti legal a grupo).

Uppat a Saksi ni Jehova ti nagtestigo a saan nga agus-usar dagiti kongregasionda kadagiti publikasion a nailista iti Federal List of Extremist Materials ken imbagada nga awan koneksionda kadagiti aramid a maibilang nga extremist. Ituloy ti Korte ti kaso inton Abril 19, 2017, iti 10:00 a.m.