NEW YORK—Rinugianen ti Korte Suprema ti Russian Federation nga usigen ti darum ti Ministry of Justice a mangiserra iti Administrative Center dagiti Saksi ni Jehova idiay Russia. Ituloy ti Korte a denggen ti kaso inton Huebes, Abril 6, 2017, iti 2:00 p.m.

Nagapelar dagiti Saksi iti Korte maikontra iti Ministry of Justice idi Marso 30, 2017. Ngem saan a pinatgan ti Korte dayta sakbay a naisardeng ti panangdengngeg iti kaso ita nga aldaw. Saan met a pinalubosan ti Korte nga agtestigo dagiti eksperto maipapan iti darum ti Ministry of Justice. Ken saan a napalubosan nga agtestigo dagiti nakakita iti pannakapalsipikar dagiti ebidensia maikontra kadagiti organisasion dagiti Saksi ni Jehova iti Russia.

Agdindinamag daytoy a kaso iti intero a lubong, kas iti maysa nga artikulo iti Time magazine a naipablaak online idi Abril 4 (“Russian Supreme Court Considers Outlawing Jehovah’s Witness Worship”) ken ti makinsango nga artikulo iti nayimprenta nga edision ti The New York Times (“Pacifist, Christian and Threatened by Russian Ban as ‘Extremist’”) idi Abril 5.

“Dakkel ti namnamami a respetuen ti Korte Suprema ti Russia ti kalintegan dagiti kapammatianmi iti Russia a nawaya nga agdaydayaw a sitatalna,” kuna ni David A. Semonian, spokesman iti world headquarter dagiti Saksi idiay New York. “Minilion a tattao iti intero a lubong ti mangsipsiput a naimbag iti taray ti kaso ken no agtignay ti Russia a mangprotektar kadagiti natulnog nga umilina, dagiti Saksi ni Jehova.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691