Bayat ti bulan ti Oktubre 2018, sinerrek dagiti polis ti nasurok a 30 a pagtaengan iti intero a makinlaud a Russia. Innem a brother ken dua a sister ti naaresto ken nasentensiaan a maibalud sakbay a mabistada gapu ta ibagbaga ti gobierno nga extremist-da. Gapuna, addan 25 a kakabsat a di nainkalintegan a naibalud, ken 18 ti naibalud iti pagtaenganda.

Oktubre 7, Sychyovka, Smolensk Region—Sinawar dagiti polis ken nakamaskara a soldado ti uppat a pagtaengan ken inarestoda ti dua a sister, ni Nataliya Sorokina nga agtawen iti 43 ken ni Mariya Troshina nga agtawen iti 41. Dua nga aldaw kalpasan a naarestoda, sinentensiaan ti Leninsky District Court dagitoy a kakabsattayo a maibaludda agingga iti Nobiembre 19, 2018. Kalpasanna, idi Nobiembre 16, 2018, inkeddeng ti Leninsky District Court a maibaludda pay agingga inton Pebrero 19, 2019 uray saanda pay a nabista.

Oktubre 9, Kirov, Kirov Region—Agarup 19 a pagtaengan ti naserrek. Naaresto ti lima a panglakayen iti kongregasion ket nasentensiaanda a maibalud. Russian ti uppat a kakabsat (da Maksim Khalturin, Vladimir Korobeynikov, Andrey Suvorkov, ken Evgeniy Suvorkov), ken Polish met ti maysa, ni Andrzej Oniszczuk. Ni Kabsat Oniszczuk ti maikadua a ganggannaet, kalpasan ni Dennis Christensen a taga-Denmark, a di nainkalintegan a naibalud iti Russia gapu iti Nakristianuan a patpatienna.

Oktubre 18, Dyurtyuli, Republic of Bashkortostan—Sinerrek dagiti polis ti agarup 11 a pagtaengan ket kinompiskarda dagiti kuarta, kard iti banko, ladawan, sursurat, kompiuter, SIM kard, ken selpon. Naaresto ni Anton Lemeshev, a maysa a panglakayen, ken nasentensiaan a maibalud iti dua a bulan sakbay a mabista. Idi Oktubre 31, 2018, nawayawayaan ken naibilin a saanna a mabalin ti pumanaw iti pagtaenganna.

Iti laksid ti agtultuloy a pangta a pannakaserrek ken di nainkalintegan a pannakaala dagiti sanikuada, itultuloy dagiti kakabsat nga ikarkararagan dagidiay naibalud ken ipaayan ida ken ti pamiliada iti praktikal a tulong no posible. Agingga a saan pay a sumayaat ti situasion, agpakpakaasi ken Jehova dagiti kakabsat iti intero a lubong para iti amin a matalek nga adipenna iti Russia, a dakamatenda pay ti nagan ti dadduma.—Efeso 6:18.