UPDATE: Idi Disiembre 22, 2017, imbasura ti Oryol Regional Court ti apela ti abogado ni Mr. Christensen a mawayawayaan bayat nga agur-uray iti pannakabista ti kasona. Agpatingga ti pannakaibaludna inton Pebrero 23, 2018. Iti dayta a tiempo, agsubli manen iti korte tapno sanguenna dagiti kaso kriminal a nakaidarumanna.

Kalpasan ti tallo nga oras a pannakadengngeg ti kasona idi Nobiembre 20, 2017, inkeddeng ti Sovietskiy District Court of Oryol, Russia a maibalud pay ni Dennis Christensen agingga inton Pebrero 23, 2018 uray no saan pay a nabista ti kasona. Daytoy ti maikadua a gundaway a ninayonan ti korte ti pannakaibalud ni Mr. Christensen iti tallo pay a bulan. Idi pay Mayo 2017 a naibalud uray saan a nabista, idi sinerrek dagiti polis ti natalna a narelihiosuan a gimong nga inatenderanna iti Oryol.

Taga-Denmark ni Mr. Christensen ken maysa a Saksi ni Jehova. Sakbay ti pannakaarestona, imparit ti Korte Suprema ti Russia ti narelihiosuan nga aktibidad dagiti Saksi ni Jehova ken naideklarada kas extremist. Inkeddeng manen ti korte ti distrito a manayonan ti pannakaibalud ni Mr. Christensen tapno makaurnong iti “ebidensia” dagiti imbestigador a mangsuporta iti pammabasolda nga illegal ti narelihiosuan nga aktibidadda. Saan a kayat ti korte nga iti balay ti pakaibaludan ni Mr. Christensen bayat a maar-aramid ti imbestigasion ken saanna nga inkaskaso ti kari ti gobierno ti Denmark a saan a maikkan iti pasaporte ni Mr. Christensen tapno saan a makapanaw iti pagilian.

Idi naaresto ni Mr. Christensen, isu ken ti asawana, a maysa nga umili iti Russia, us-usarenda ti wayawayada nga agdaydayaw ken agtataripnong. Mabalin nga ibilin ti korte nga agtalinaed ni Mr. Christensen iti pagbaludan agingga iti dua a tawen uray saan pay a nabista ti kasona. No masentensiaan, mabalin a maibalud iti innem agingga iti sangapulo a tawen.