NEW YORK—Idi Hunio 2, 2017, pinadayawan dagiti opisial ti siudad ti Oryol idiay Russia ti kongregasion dagiti Saksi ni Jehova sadiay kas panagyaman iti pannakiramanda iti tinawen a panagdalus iti siudad idi Abril 22, 2017. Adda 70 a Saksi a nagmalmalem a nagboluntario a nangikkat iti basura kadagiti kalsada ti Oryol ken iti Orlik River, a nagsikkosikko a karayan iti siudad. Kas simbolo ti panagyaman dagiti opisial ti siudad, inikkanda dagiti Saksi iti bassit a regalo ken surat. Mabasa iti maysa a paset ti surat: “Kas panagyaman iti nasayaat a naaramidanyo iti komunidad ken iti aglawlaw.”

Nupay kasta, maysa a bulan kalpasan ti panagdalus, ken maysa a lawas sakbay ti pormal a panagyaman dagiti opisial ti siudad, maysa kadagiti Saksi a nagboluntario a ni Dennis Christensen (a naipakita iti makinkannawan a paset ti ladawan iti ngato) ket naaresto gapu iti maipagarup nga extremist nga aktibidad bayat ti panagatenderna iti natalna a gimong idi Mayo 25. Us-usaren dagiti autoridad iti Russia ti akusasion nga extremist nga aktibidad a mangpuntiria kadagiti Saksi ni Jehova iti intero a pagilian.

“Saan a nakaskasdaaw para kadagiti makaam-ammo kadagiti Saksi ni Jehova nga agboluntario ni Dennis ken ti dadduma pay a miembro ti kongregasion nga agdalus iti siudadda. Adun a tawen nga ar-aramidenda dayta, ken intultuloyda uray no naipasardeng ti legal a korporasionda idi 2016,” kuna ni David A. Semonian, a pannakangiwat dagiti Saksi ni Jehova iti sangalubongan a hedkuarterda. “Pagaammo dagiti Saksi ni Jehova idiay Oryol ken iti dadduma pay a siudad iti intero a lubong kas nasayaat nga ehemplo iti komunidad. Isu a nakaskasdaaw a ni Dennis, a nagaget ken managtungpal iti linteg a Kristiano, ket matrato a kas kriminal di nagbayag kalpasan ti panangtulongna iti komunidadna a pinadayawan dagiti opisial iti Oryol. Mamatikami a masapul a mawayawayaan a dagus ni Dennis ken mapalubosan a mangituloy iti natalna a panagdaydayawna ken panangtulongna iti komunidad a kadua dagiti kapammatianna.”

Naaresto ni Mr. Christensen dandani makatawen kalpasan a naipasardeng ti legal a korporasion nga us-usaren dagiti Saksi ni Jehova idiay Oryol idi Hunio 14, 2016. Ti pannakaidarumna ket napasamak met kalpasan a nairuar ti desision ti Korte Suprema ti Russian Federation idi Abril 20, 2017, a maipasardeng ti Administrative Center of Jehovah’s Witnesses idiay Russia, nga asideg iti St. Petersburg. Iggem pay laeng dagiti autoridad ti Oryol ni Mr. Christensen bayat nga agur-uray iti pannakabistana.

Media Contact:

David A. Semonian, Office of Public Information, +1-845-524-3000