Impadamag ti sumagmamano nga internasional a news media a bayat ti nabiit pay a panagsukisok idiay rehion ti Kirov iti Russia, nakakita kano dagiti autoridad “kadagiti armas” a kukua dagiti Saksi ni Jehova. Nupay kasta, ti makimbalay iti nakasarakanda “kadagiti armas” ket saan a Saksi ni Jehova. Kinaagpaysuanna, dagiti “armas” ket tallo nga aglatlatin ken saanen a mausar a banag manipud idi Gubat Sangalubongan II—dua a granada ken maysa a bomba a naimula iti daga. Ti asawa ti lalaki a makinkukua kadagitoy a banag ket maysa a Saksi ni Jehova. Saanna nga ammo nga adda ik-ikutan ni lakayna a kakastoy.

Ti makinkukua kadagitoy ket dati a lider ti grupo dagiti Russian a mangbirbirok kadagiti bagi dagiti soldado a napapatay idi Gubat Sangalubongan II tapno maikkanda iti nadayaw a pannakaipumpon. Pagaammo dagitoy a grupo iti awag a “Poisk,” wenno “Search.” Bayat ti panagtrabahoda, masansan a makabirokda kadagiti banag a nausar idi iti gubat, karaman dagiti armas a saanen a maus-usar ita.

Bayat nga itultuloy dagiti autoridad ti Russia a padaksen ken dadaelen ti reputasiontayo kas mannakikappia a tattao, laglagipentayo ti sasao ni Jesus, a nangipakpakauna a dagiti bumusbusor ‘padaksenda’ dagiti pasurotna.​—Mateo 5:11.