NEW YORK—Adda pangta a dandanin maiparit ti panagdaydayaw dagiti Saksi ni Jehova idiay Russia. Gapu iti dayta, agtignayda babaen ti direkta a panagpakaasida iti tulong dagiti opisial ti Kremlin ken Korte Suprema babaen ti sangalubongan a kampania ti panagsurat. Aw-awisen ti Bagi a Manarawidwid dagiti Saksi ni Jehova a makipaset ti nasurok a 8,000,000 a Saksi iti intero a lubong.

Idi Marso 15, 2017, nangyuli ti Ministry of Justice ti Russia iti kiddaw iti Korte Suprema ti Russian Federation tapno ibilangna ti Administrative Center dagiti Saksi ni Jehova idiay Russia kas extremist ken i-liquidate-da dayta. Karaman met iti dayta a kiddaw ti pannakaiparit dagiti aktibidad ti Administrative Center. No aprobaran ti Korte Suprema dayta a kiddaw, maipaserra ti nasional a hedkuarter dagiti Saksi iti asideg ti St. Petersburg. Kalpasanna, ma-liquidate met ti agarup 400 a rehistrado a Local Religious Organizations, ket maiparit dagiti aktibidad ti panagdaydayaw ti nasurok a 2,300 a kongregasion dagiti Saksi ni Jehova idiay Russia. Ti pasilidad ti sangay, agraman dagiti pasdek a pagdaydayawan nga us-usaren dagiti Saksi iti intero a pagilian ket kompiskaren ti Gobierno. Kasta met, maidarum ti tunggal Saksi ni Jehova ta maibilangdan a kriminal gapu laeng ta itultuloyda nga aramiden dagiti aktibidad a karaman iti panagdaydayawda. Inton Abril 5 ti manamnama a panagdesision ti Korte Suprema.

“Kayat ti Bagi a Manarawidwid dagiti Saksi ni Jehova a maipakaammo iti intero a lubong daytoy a napeggad a situasion,” kuna ni David A. Semonian a pannakangiwat dagiti Saksi iti sangalubongan a hedkuarterda. “Ti panangidarum kadagiti natalna, natulnog nga umili a kas man la teroristada ket nalawag a saan nga umiso a panangipatungpal kadagiti linteg kontra iti extremism. Ti kasta a panangidarum ket interamente a naibasar kadagiti saan nga agpayso a pangibatayan.”

Saan la nga ita nga aramiden dagiti Saksi daytoy a sangalubongan a kampania. Agarup 20 a tawenen ti napalabas, nagsurat dagiti Saksi tapno idepensada dagiti karelihionanda idiay Russia gapu iti pammadakes ti dadduma nga opisial ti gobierno iti daydi a tiempo. Nangaramid metten idi dagiti Saksi kadagiti kasta a kampania a panagsurat tapno matignay dagiti opisial ti gobierno a mangpasardeng iti pannakaidadanes dagiti Saksi iti dadduma a pagilian, a pakairamanan ti Jordan, Korea, ken Malawi.

“Ti panagbasa iti Biblia, panagkanta, ken panagkararag a kadua dagiti karelihionan ket nalawag a saan a kriminal nga aramid,” kinuna pay ni Mr. Semonian. “Manginanamakami a ti sangalubongan a kampania a panagsurat ti mangtignay kadagiti opisial ti Russia a mangpasardeng iti daytoy saan a nainkalintegan nga aksion kontra kadagiti karelihionantayo.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691