Idi Mayo 25, 2017, sininga dagiti armado a polis ken agtrabtrabaho iti Federal Security Service (FSB) ti natalna a linawas a gimong dagiti Saksi ni Jehova iti Oryol, Russia. Impakaammo dagiti autoridad nga idarumda dagiti Saksi gapu iti maipagarup a panangitultuloyda iti aktibidad ti maysa nga extremist nga organisasion. Idi Hunio 14, 2016, impaiserra ti gobierno ti Oryol Local Religious Organization (LRO) gapu iti maipagarup nga extremist nga aktibidad. Kanayonanna, inlista dagiti autoridad ti personal nga impormasion ti amin nga immatender iti gimong, kinompiskarda dagiti gadyet, ken idi agangay, sinukisokda dagiti balay dagiti Saksi iti Oryol.

Dagiti lallaki iti kongregasion ti Oryol ket impan dagiti autoridad kadagiti opisina ti FSB ken imbaludda ni Dennis Christensen a maysa nga umili ti Denmark ken panglakayen ti kongregasion. Dagus a nangipila ti prosekiutor iti aplikasion iti Sovietskiy District Court a mangkiddaw iti pannakaibalud ni Mr. Christensen sakbay a mabista tapno adda tiempo ti FSB nga agurnong iti ebidensia ken agbirok kadagiti testigo a mangsuporta iti darumda. Inaprobaran ni Judge Svetlana Naumova ti aplikasion a mangibilbilin a maibalud ni Mr. Christensen iti dua a bulan bayat a maur-uray ti pannakabistana. Maipasa ita nga aldaw ti reklamo kontra iti bilin. No maabak iti kaso, mabalin a masentensiaan iti innem agingga iti sangapulo a tawen a pannakaibalud sigun iti Article 282.2, part 1, ti Criminal Code.

Ti kongregasion dagiti Saksi ni Jehova iti Oryol ket madama idi nga aggigimong kas grupo dagiti agdaydayaw iti Dios—saan dayta a legal a korporasion. Ipakita dagiti inaramid dagiti autoridad ti Russia a ti talaga a puntiriada ket ti panagdaydayaw dagiti Saksi, saan la a dagiti legal a korporasionda (LRO). Kapada met laeng dayta ti napasamak kadagiti Saksi iti siudad ti Taganrog. Idi damo, dagiti autoridad pinasardengda ti LRO sadiay. Idi agangay, kinasuanda ti 16 a Saksi iti extremist nga aktibidad gapu ta intultuloyda ti nagtataripnong tapno agdaydayaw. Idi Nobiembre 2015, nagdesision ti korte a nakabasolda amin ngem saan pay a naipakat ti sentensia ken multada. Iti agdama, us-usigen ti European Court of Human Rights ti kasoda.