Idi Hulio 17, 2017, sinuportaran ti Korte Suprema ti Russia ti immun-una a desision a maibilang nga illegal ti aktibidad dagiti Saksi ni Jehova sadiay. Nalawag a saan nga inkabilangan ti Korte ti kari ti pagilian a protektaranna ti wayawaya ti relihion. Gapu iti dayta a desision, naiparit ti panagdaydayaw dagiti Saksi ni Jehova iti intero a pagilian.

Ti panel ti Appellate Chamber ti Korte Suprema a buklen ti tallo a hues imbasurana ti apelar dagiti Saksi ket sinuportaranna ti desision ti Korte idi Abril 20 nga inruar ni Judge Yuriy Ivanenko. Pabor ti desisionna iti kiddaw ti Ministry of Justice a “maiserra ti ‘Administrative Center dagiti Saksi ni Jehova iti Russia’ ken dagiti local religious organization a paset ti estrukturana [ken] maited iti Russian Federation ti amin a sanikua ti naipaserra a relihion.”

Gapu iti dayta a desision, saanen a natalged ti kasasaad ti nasurok a 175,000 a Saksi ni Jehova idiay Russia. Imbaga ni Philip Brumley, a General Counsel para kadagiti Saksi ni Jehova: “Maasian unay dagiti Saksi ni Jehova iti intero a lubong kadagiti kapammatianda iti Russia. Ti desision ti appellate chamber ket nangted iti legal a pakaibatayan ti pannakaabuso a mapaspasaran dagiti Saksi ni Jehova iti Russia, ken gapu iti dayta, mabalin a nalaklakadan a maidarum ken ad-adda pay a maidadanes. Mailaklaksidda iti bukodda a pagilian.”

Dagiti Saksi ni Jehova idiay Russia ket nagapelar iti European Court of Human Rights ken iti UN Human Rights Committee para iti hustisia. Kabayatanna, ikarkararag dagiti kapammatianda iti intero a lubong a balbaliwan koma ti gobierno ti Russia ti takderna ken bigbigenna dagiti kangrunaan a kalintegan ti tao “tapno maitultuloy [dagiti Saksi] ti agbiag a natalinaay ken naulimek buyogen ti naan-anay a nadiosan a debosion,” kas mabasa iti 1 Timoteo 2:2.