NEW YORK—Inton Biernes, Mayo 18, 2018, irugin dagiti Saksi ni Jehova ti serye ti tinawen a kombensionda. Napauluan ti kombension ita a tawen iti “Agbalin a Natured!” Sakbay dayta nga okasion, makiraman dagiti Saksi iti sangalubongan a kampania tapno awisenda ti publiko nga umatender iti dayta a programa nga awan bayadna. Maangay ti kombension iti 180 a pagilian.

Adda 54 a paset ti tallo nga aldaw a programa a maiparang iti nagduduma a pamay-an kas iti lektiur, audio drama, interbiu, ken ababa a video. Kanayonanna, maipabuya iti maudi nga aldaw ti kombension ti pelikula a napauluan, Ti Pakasaritaan ni Jonas—Pakasursuruan iti Tured ken Asi. Tunggal aldaw, mairugi ti sesion iti agsapa ken malem babaen ti music video a naisagana para iti kombension.

Kuna ni David A. Semonian, a pannakangiwat dagiti Saksi ni Jehova: “No kumitaka kadagiti damdamag ita, nalawag a makitam a kimmaro ti pakadanagan ken buteng a pakaipaspasanguan ti amin a tattao, aniaman ti edadda. Kasapulan ti tured tapno mapagballigian dagita. Awisenmi ti amin iti kombension ita a tawen tapno mabenepisiaranda kadagiti makatulong a balakad a linaon ti Biblia.”

Makita iti jw.org, nga opisial a website dagiti Saksi, ti petsa ken lokasion dagiti kombension.

Media Contact:

David A. Semonian, Office of Public Information, +1-845-524-3000