Idi Nobiembre, nagiwaras dagiti Saksi ni Jehova iti intero a lubong iti publiko nga edision Ti Pagwanawanan No. 2 2020 kadagiti negosiante, kapamilia, ken interesado a tattao. Ngem naidumduma daytoy a kampania ta adu nga opisial ti gobierno ti nakaawat iti magasin. Adun a nagsasayaat a komento ti naawat dagiti sanga nga opisina.

Idiay Sierra Leone, ni Rex Bhonapha, a Deputy Minister of the Ministry of Lands, Housing, and Country Planning, ket nagsurat kadagiti kakabsat tapno agyaman ta pinatulodanda iti magasin. Innayonna: “Naparegtaak iti magasinyo. Adu ti nasursurok. Inaldaw nga agbasbasaakon iti kastoy.”

Idiay Samoa, nangipatulod ti Prime Minister iti thank you letter ket imbagana nga umanamong a napateg ti Kararag ti Apo, wenno “Amami.” Malaksid iti dayta, imbaga ti Head of State a ni Tuimalealiifano Vaaletoa Sualauvi II, nga ap-apresiarenna ti trabahotayo a panangisuro iti Biblia. Imbagana a “makatulong daytoy kadagiti tattao, ken makasursuroda iti maipapan iti Biblia tapno agbalbaliw ti biagda.” Kinomendaranna pay dagiti kakabsat ta insardengda pay laeng ti panaggigimongda iti Kingdom Hall ken ti panangasabada iti binalaybalay gapu iti COVID-19 pandemic.

Imbaga ni Osvaldo Cartagena García, a Municipal Secretary idiay Chile: “Sapay koma ta ti nagsayaat a kampaniayo ket makatulong kadagiti amin nga adda iti autoridad iti intero a pagilian ken komunidad, ken matignayda nga agaramid iti nasayaat para iti intero a komunidad, nangnangruna ita ta adda problema a mapaspasaran ti pagilian iti intero a lubong.”

Maysa a miembro ti German parliament (Deutscher Bundestag) ti nagsurat iti sangay iti Central Europe idiay Germany. Imbagana: “Saan a baro kaniak ti relihionyo. Raraemek dagiti miembro ti relihionyo ta situtured nga ibagbagada nga isuda ket Saksi ni Jehova. . . . Ammok met a ti relihionyo ti kakaruan ti pannakaidadanesna kabayatan ti turay ti Nazi.”

Maysa met a Federal State Ministry ti Germany ti nagyaman kadagiti Saksi gapu ta nangtedda iti liwliwa kadagiti tattao bayat ti COVID-19 pandemic. Imbagana: “Dakkel ti maitultulongyo tapno agkaykaysa dagiti tattao iti pagiliantayo.”

Idiay Colombia, adda maysa a Senador ken maysa a Kongresista a nagsurat iti sangay tapno agyamanda iti magasin, ken kunada a kayatda nga ipabasa dayta iti sabsabali. Kastoy met ti insurat ti maysa nga opisial ti Ministry of Environment and Sustainable Development: “Agyamanak unay ta pinatulodandak iti magasin a Pagwanawanan ta naglaon daytoy iti makaispal-biag a mensahe!”

Imbaga met ni Frank Okyere, nga ambassador ti Ghana idiay Japan: “Adu ti nasursurok iti magasin ta impakitana no kasano a masolusionan dagiti problema iti lubong.”

Kuna met ti ambassador ti Azerbaijan: “Agyamanak unay ta pinatulodanyo ti embassy iti espesial a ruar Ti Pagwanawanan. Nagustuak unay ti nabasak iti magasin.”

Umanamongtayo iti imbaga ni Brother Amaro Teixeira, a mangiwanwanwan iti Public Information Desk iti sangay ti Mozambique: “Saantay a ninamnama a kastoy ti kasayaat ti resulta ti kampania. Naidanon ti mensahe maipapan iti Pagarian kadagiti tattao a masansan a saantayo a makaskasabaan.”

Sigurado nga adu pay ti maawattayo nga ebkas ti apresasion dagiti opisial ken ti dadduma pay bayat nga itultuloytayo nga idanon ti mensahe ti Biblia “kadagiti nangato ti saadna.”—1 Timoteo 2:2.