Daytoyen ti maikatlo a tawen nga adda audio description dagiti tinawen a kombensiontayo. Ti audio description deskribirenna dagiti ladawan ken eksena a mapaspasamak iti video. Dagiti bulsek ken nakapuy ti panagkitana ti nangnangruna a mangus-usar kadagita. Itultuloy dagiti Saksi ni Jehova ti agaramid kadagiti audio description tapno maipaayan iti naespirituan a taraon ti agarup 43 a milion a bulsek ken 295 a milion a nakapuy ti panagkitana iti intero a lubong.

Kastoy ti imbaga ni Dr. Joel Snyder a presidente ti Audio Description Associates, LLC ken pagaammo nga eksperto iti audio description: “Agbilbilibak iti ar-aramiden dagiti Saksi ni Jehova a mangipaay iti impormasion a makatulong kadagiti bulsek ken nakapuy ti panagkitana. Ikagkagumaanda nga ikkan iti audio description dagiti video-da tapno ad-adda a mabenepisiaran dagiti bulsek. Manmano ti mangar-aramid iti dayta. Isu a kayatko ti agyaman kadagiti Saksi ni Jehova.”

Idi nagdesision ti Bagi a Manarawidwid a maaramid a virtual ti 2020 a kombension gapu iti pandemic, napagdesisionanda met a maikkan iti audio description dagiti video. Idi 2020, ti Translation Services iti Sangalubongan a Hedkuarter dagiti Saksi ni Jehova iti Warwick, New York, U.S.A., ti nangaramid kadagiti audio description ti kombension. Ngem idi 2021, naited daytoy a trabaho iti Text Processing Services iti Watchtower Educational Center of Jehovah’s Witnesses iti Patterson, New York. Nag-online seminar ti audio description team tapno masanayda no kasano ti agaramid iti nalaka a maawatan nga audio description.

Inlawlawag ni Dr. Snyder a “mabalin a sanayen dagiti tattao nga agpraktis tapno nalaka a maawatan ti aramidenda nga audio description.” Kunana a maaramidda dayta no “agusarda iti sasao nga ababa, nalawag, ken nalaka a maimadyin.”

Kas pagarigan, no agaramidda iti audio description ti maysa a video ti kombension, denggen nga umuna ti team dagiti Saksi ti audio laeng. Saanda a buyaen ti video tapno mapadasanda ti rikna ti maysa a bulsek wenno nakapuy ti panagkitana. Isurat ti tunggal miembro ti team no ania ti naimadyinna maibatay iti nangngegna. Kalpasanna, i-play-da manen ti video ket siputanda dagiti paset nga awan ti agsasao ta dita a maikabil dagiti audio description.

Adda rigrigatna ti panangyanay kadagiti audio description iti nagbabaetan dagiti dialogue iti video. Imbaga ni Michael Millen, a maysa a miembro ti audio description team dagiti Saksi ni Jehova, ‘Gapu ta ababa laeng dagiti espasio, masapul a pilienmi ti kapatgan nga impormasion tapno nalaka a maawatan ti video. Ikarkarigatanmi nga ikabil ti oras, lugar, dagiti aktor, ken dagiti ar-aramidenda.’

Masapul a liklikan ti audio description team ti mangted iti bukodda nga interpretasion iti makitkitada iti video. Iti libro ni Dr. Snyder a The Visual Made Verbal, ipalpalagipna kadagiti agar-aramid iti audio description: “Bay-anyo a dagiti agdengdengngeg ti mangimadyin iti mapaspasamak iti eksena maibatay iti deskripsion a mangmangngegda. Kas pagarigan, diyo ibagbaga: ‘Makapungpungtot,’ wenno ‘Malidlidayan.’ Imbes ketdi, ibagayo: ‘Nakagemgem iti nairut,’ wenno ‘Agsangsangit.’”

No nalpasen nga insurat ti audio description team ti iskrip, irekord daytan ti voice actor. Masapul a kalmado ken agpapada ti tono ti panagbasana. Imbaga ni Michael Millen: “Saan a kasapulan a tuladen ti voice actor ti emosion dagiti karakter iti video. No naganaygay wenno emosional unay ti voice actor, mabalin a panunoten dagiti agdengdengngeg nga isu ket sabali pay a karakter iti video.”

I-edit dayta ti technical crew sa maipatulod ti translation package iti amin a sangay tapno maipatarus ken mairekord ti audio description iti lengguaheda. Imbaga ni Michael nga iti dua a napalabas a kombension, agarup tallo nga oras ti panagaramid iti audio description ti tunggal maysa a minuto ti video.

Iti agdama, agipatpatarus dagiti Saksi ni Jehova kadagiti pagbasaan ken naibatay-Biblia a publikasion iti nasurok a 1,000 a lengguahe. Saan a karaman iti dayta ti audio description ngem ibilang ti dadduma a maysa met laeng a lengguahe dayta. Imbaga ni Michael, ‘Ti audio description ket patarus para kadagiti bulsek. Mayes-estoria ti mabuybuya iti video.’

Agyamyamantayo ken Jehova ta sigsiguraduenna a makaawat ti amin a tattao, aniaman ti kasasaadda, iti impormasion a mangpabileg iti pammatida!—Isaias 65:13.