Idi Septiembre 1, 2022, magagaran dagiti Saksi ni Jehova iti intero a lubong nga agsubli iti trabaho a pagaammo nga ar-aramidenda, ti panangasaba iti binalaybalay. Ad-adda pay magagaranda ta adda espesial a kampania a panangawis iti panangyadal iti Biblia iti dayta a bulan. Para iti dadduma a kakabsat, panagsubli daytoy iti kita ti ministerio a nakairuamandan ken pagay-ayatda. Para met iti dadduma, daytoy ti damoda nga aktual nga isarita ti mensahe ti Biblia kadagiti kaarrubada. Ipakita dagiti sumaganad a kapadasan iti agduduma a paset ti lubong ti nakallalagip a panangrugi ti 2023 a tawen serbisio.

Idi Septiembre 2, 2022, ti dua a sister a da Nicole ken Tina a taga-Petershagen idiay North Rhine-Westphalia, ket napan iti maysa nga apartment tapno mangasaba, ngem awan ti nakasaritada. Idi pumanawdan, adda agtutubo a babai a nangayab kadakuada. Imbaga ti babai nga idi nagtuktokda, dina dagus ida nailukatan iti ridaw. Pinagsublina ida tapno pagsasaritaanda ti Biblia. Idi simrekda iti apartment ti babai, nakitada iti lamisaan ti maysa a kopia ti Baro a Lubong a Patarus ti Nasantuan a Kasuratan a madlaw a kanayon a mabasbasa. Imbaga ti babai a naalana dayta idi agnanaed idiay Italy tallo a tawenen ti napalabas. Ngem idi immakar idiay Germany bayat ti pandemic, awanen ti nakasaritana a Saksi ni Jehova. Naginnalada iti contact information ken inawisda ti babai a makigimong. Kalpasan ti dua nga aldaw, nakigimong ti babai a kadua ti dua nga annakna. Nayurnos ti panagadal iti Biblia ti babai.

Da Manuel ken Karol Gastelum nga special pioneer iti Mam-language field, nakasaritada ti maysa a nasingpet a babai ket pinastrekna ida iti balayna. Saan nga ammo ti babai nga adda nagan ti Dios, isu a pinagsasaritaanda ti leksion 04 ti libro nga Agbiagka a Naragsak iti Agnanayon! a napauluan “Asino ti Dios?” Idi binasada ti Isaias 42:8, nasdaaw ti babai ta nakitana ti nagan ti Dios a Jehova iti mismo a Bibliana.

Nagsangit ti babai ken nabigbigna a saan nga umdas a basta addaan iti Biblia ti maysa. Naammuanna a masapul nga adalenna dayta tapno makapagbiag maitunos iti mensahe ti Biblia. Idi nalpasdan ti leksion, kasta unay ti panagyaman ti babai kadagiti naadalna. Imbagana nga iranudnanto dagita ken lakayna. Inyurnos ti agassawa a Gastelum a maitultuloy ti saritaanda maipapan iti Biblia.

Idiay Yokohama, nangasaba da Brother ken Sister Nukamori iti maysa a balay babaen ti intercom. Maysa a boses ti babai ti simmungbat. Inyam-ammoda ti bagida iti bumalay ken imbagada a maysada a Saksi ni Jehova. Imbaga ti bumalay nga agurayda biit. Idi kuan, linuktanna ti ruangan ket imbagana, “Ur-urayek dagiti Saksi ni Jehova a bumisita kaniak.”

Kinunana pay a nairugina ti makipagadal iti Biblia kadagiti Saksi ni Jehova idiay Nagasaki. Idi immakar idiay Yokohama bayat ti pandemic, nagtultuloy ti panagadalna babaen ti Zoom. Iti dayta a lawas sakbay a nakasaritada, imbaga ti mangyad-adal kenkuana: “Addanto kampania iti Septiembre. Sigurado nga addanto umay a Saksi ni Jehova. Ibagam kenkuana a no mabalin, iyadalannaka iti Biblia in-person.” Naragsakan ti bumalay ta dagus a nasarakan dagiti Saksi. Imbagana pay a talaga a kayatna ti makigimong ken nayeskediul ti sumaruno a panagadalna iti Biblia.

Idi inyopreser ti agassawa a Saksi ti panagadal iti Biblia iti maysa a babai, imbaga ti babai a datin a makipagad-adal kadagiti Saksi ni Jehova ken makigimgimong payen adun a tawen ti napalabas. Ngem naisardeng dayta ken mabain a mangbirok manen kadagiti Saksi ta saan nga agbibiag maitunos kadagiti prinsipio ti Biblia. Apaman a naibagana dagita, nagsangsangit. Imbasa kenkuana ti agassawa ti Salmo 10:17 ken inlawlawagda a saan a linipatan ni Jehova isuna. Kinomendaranda met ti tarigagayna nga agbiag maitunos kadagiti estandarte ni Jehova. Immanamong a mayadalan iti Biblia ken imbagana a kayat met ti 16 ti tawenna a baritona a maammuan ti ad-adu pay maipapan iti Biblia.

Idi nagsubli ti agassawa iti sumaruno nga aldaw, agur-uray ti babai ken ti baritona. Kalpasan nga inadalda ti leksion 01 ti broshur nga Agbiagka a Naragsak iti Agnanayon!, inawis ida ti agassawa nga umatender iti gimong iti ngudo ti lawas, ket napanda. Determinado ti agina nga itultuloyda ti agadal ken makigimong.

Inkararag ni Ramon nga adda koma makasabaanna iti umuna nga aldaw nga agbalaybalay manen. Iti damo a balay a napananna, inlukat bassit ti bumalay a babai ti ruanganna sa simmirip. Kinablaawan ni Ramon sa inyam-ammona ti bagina. Sakbay pay a rugianna ti mangasaba, imbaga ti babai: “Dimo la ammo no kasano kabayag nga inur-urayko daytoy nga aldaw. Idik pay la nga ikarkararag nga adda koma umay ken agtuktok iti ridawko.”

Imbaga ti babai a nakasarsaritanan dagiti Saksi sumagmamano a tawenen ti napalabas ken immatender payen iti gimong. Ngem idi immakar iti sabali a lugar awanen ti nakasaritana a Saksi. Inlawlawag ni Ramon a naisardeng pay laeng idi ti panangasaba iti binalaybalay gapu iti pandemic. Imbasa ni Ramon ti Salmo 37:29 ken inlawlawagna ti urnos a panagadal iti Biblia. Dagus nga inawat ti babai ti panagadal iti Biblia. Inyurnos ni Ramon nga adda sister a mangbisita iti babai.

Kalpasan daytoy a kapadasanna, imbaga ni Ramon: “Ammok nga iturturongnatayo ni Jehova ken dagiti anghel kadagidiay kayatna ti dumngeg.”

Idi napan ni Katelyn Thompson iti maysa a balay idiay Kentucky, nakitana nga adda dagiti nakasurat a bersikulo ti Biblia iti maysa a mailbox, ken bassit a karatula iti paraangan nga adda nakasurat a “Jesus Loves You.” Idi Nagtuktok ni Katelyn, adda babai a simmungbat. Inyam-ammo ni Katelyn ti bagina ken imbagana a saan a personal a nakasarsarungkar dagiti Saksi ni Jehova kadagiti kaarrubada gapu iti COVID-19 pandemic. Imbagana met a nangparparegta ken nangliwliwa dagiti Saksi iti dadduma babaen kadagiti surat ken telepono. Kinomusta ni Katelyn ti babai ken ti pamiliana. Imbaga ti babai a natay ni tatangna bayat ti pandemic. “Nakaawatak kadagiti sursuratyo,” kinunana, “ket nariknak nga inted ti Dios ti kasapulak unay iti daydi a tiempo!” Nakipagrikna ni Katelyn sa pinagsaritaanda ti leksion 02 ti broshur nga Agbiagka a Naragsak iti Agnanayon! Binasada dagiti teksto iti leksion ken nagpokusda iti namnama a panagungar iti masanguanan. Nangrugi a nagsangit ti babai. Imbagana nga iti dayta nga aldaw, eksakto a makatawenen a natay ni tatangna. Inted ti babai ti contact information-na ken Katelyn ken immanamong a masarungkaran manen. Idi kuan, nagteks ti babai ken Katelyn a kunkunana: “Thank you ta nalag-anan ti riknak. Kasapulak unay dayta ita!”

Awan duadua a binendisionan ni Jehova ti pannakaisubli ti panangasaba iti binalaybalay ken ti kampania a panangirugi iti panagadal iti Biblia. Padpadaanantayo dagiti nagsasayaat a resultana!—Juan 4:35.