Bayat ti 2020 a tawen serbisio, naipasango dagiti Saksi ni Jehova iti intero a lubong kadagiti awan pay kapadana a karit iti naespirituan nga aktibidadda. Ngem iti laksid dagita, naipakita ti determinasion dagiti kakabsattayo nga agtalinaed a matalek ken agkaykaysa.

Ti kangrunaan a karit ket gapu iti COVID-19 pandemic, a nangpataud kadagiti problema iti intero a lubong a saan pay a napaspasaran ti adu a henerasion.

Dagus a nangaramid dagiti Saksi ni Jehova iti panagbalbaliw bayat ti pandemic. Nangaramidda kadagiti baro a pamay-an tapno makapagtataripnongda latta nga agdaydayaw, makapagpipinnaregta, ken maikasabada ti naimbag a damag.

Adtoy ti dadduma a “naimbag a damag” iti daytoy nakallalagip a tawen.—Proverbio 15:30.

Bayat ti 2020 a tawen serbisio, inruar ti organisasiontayo ti intero wenno ti dadduma a paset ti Baro a Lubong a Patarus ti Nasantuan a Kasuratan iti 36 a lengguahe. Gapu kadagiti restriksion ti COVID-19, adu kadagita a Biblia ti nairuar iti elektroniko a pormat bayat dagiti virtual a taripnong. Magun-odanen ti intero wenno dadduma a paset ti Baro a Lubong a Patarus iti 193 a lengguahe.

Manipud idi Marso 18, 2020, mangipapaayen dagiti miembro ti Bagi a Manarawidwid iti espesial a binulan a video program a konektado iti pandemic iti jw.org ken JW Library app.

Iti umuna nga update, imbaga ni Brother Stephen Lett a nupay makapa-stress ti pandemic, dayta ket nabileg nga ebidensia nga “agbibiagtayon iti maudi a paset ti maudi nga al-aldaw—ti kaudian a paset ti maudi a paset ti maudi nga al-aldaw!”

Iti laksid dagiti problema ita, imbaga ni Brother Lett: “Kas ili ni Jehova, saantayo nga ag-panic.”

Karaman iti tunggal video update dagiti makaparegta a report iti intero a lubong. Ipakita dagitoy a report a nainsiriban ti panangipangag iti panangiwanwan ti Bagi a Manarawidwid. Iti adu a situasion, dagiti opisial ti gobierno dinayawda ti organisasiontayo gapu iti naintiempuan ken nainsiriban a panagtignaytayo iti epekto ti pandemic.

Adun a dekada nga agtataripnong ti ili ni Jehova iti moderno a panawen para iti tinawen a panangselebrar iti Pangrabii ti Apo. Iti daytoy a tawen, naiparit wenno saan a naiparegta ti panagtataripnong iti adu a lugar. Kadagitoy a kasasaad, nangaramid ti tunggal indibidual ken pamilia iti bukodda nga emblema ti Memorial ken binuyada ti palawag ti Memorial babaen ti videoconferencing.

Iti dadduma a lugar, saan a posible ti videoconferencing. Kasta ti kasasaad iti 11 a sangay iti Africa. Inyurnos dagitoy a sangay a maibrodkas iti telebision ken radio ti programa ti Memorial. Gapu iti daytoy nga urnos, nasurok a 407,000 nga agibumbunannag ti dimngeg iti programa, a pakairamanan ti nakaad-adu nga interesado a tattao.

Inaprobaran ti Bagi a Manarawidwid iti dadduma a sangay a maibrodkas dagiti gimong ti kongregasion babaen ti telebision ken radio a kas iti pannakaibrodkas ti Memorial. Iti kasta, dagiti agibumbunannag kadagiti pagilian a narigat ti situasionda mabalinda a denggen ti linawas a gimong ti kongregasionda iti radio ken telebision. Agingga ita, 23 a sangay ti mangar-aramiden iti daytoy, a pakairamanan dagiti lugar idiay Africa, Europe, North America, ken South America.

Gapu kadagiti epekto ti COVID-19 pandemic, adu a kakabsattayo ti marigatan a mangala kadagiti kangrunaan a kasapulanda. Nasurok a 400 a Disaster Relief Committee ti naapointaran iti intero a lubong tapno tumulong kadagiti agibumbunannag a saan a makaala kadagiti kangrunaan a kasapulanda iti lugarda. Bayat ti 2020 a tawen serbisio, inaprobaran ti Bagi a Manarawidwid ti nasurok nga $18 a milion tapno matulongan ti nasurok a 330,000 nga agibumbunannag a naapektaran kadagiti resulta ti COVID-19.

Iti kaunaan a gundaway, virtual ti programa ti rehional a kombension, kayatna a sawen, nabuya dayta iti balay wenno babaen ti Internet. Dagiti miembro ti Bagi a Manarawidwid ken dagiti katulonganda ti nangiparang iti amin a paset ti kombension kas nairekord a video. Naipatarus dagitoy a video iti nasurok a 500 a lengguahe. Magun-odan ti programa ti kombension iti jw.org ken iti JW Library app tapno natalged a makapagbuya dagiti agibumbunannag ken interesado a tattao iti balbalayda.

Malaksid iti panagsagaba gapu ti pandemic, kumarkaro ti pannakaidadanes dagiti kakabsattayo iti nagduduma a pagilian.

Idiay Russia, iti napalabas a tawen, nagsagaba ti ginasut a Saksi gapu iti illegal a pannaka-raid ti balayda ken pannakaarestoda. Iti agdama, 42 a kakabsat a lallaki ken babbai ti naibalud idiay Russia, ken adda pay 2 idiay Crimea. Sipud idi naipaulog ti desision ti Korte Suprema ti Russia idi 2017, nasuroken a 1,000 a balay dagiti kakabsattayo ti na-raid.

Ti kaaduan a bilang dagiti naibalud a Saksi ket idiay Eritrea, nga adda ti 52 a naibalud iti agdama. Karaman kadakuada ket da Paulos Eyasu, Isaac Mogos, ken Negede Teklemariam, a naibalud sipud idi Septiembre 17, 1994 gapu ta dida kayat ti agsoldado. Adda pay 26 a kakabsat a lallaki ken babbai a naibalud iti nasurok a 10 a tawen.

Itultuloytayo nga ikararagan ti amin a naibalud a kakabsattayo nga agtalinaedda koma a natured. Ammotayo a pampaneknekanda a matalekda bayat nga ib-ibturanda dagiti pakasuotan.—Apocalipsis 2:10.

Iti napalabas a tawen serbisio, pinaneknekan dagiti Saksi iti intero a lubong ti kinamatalekda ken Jehova babaen ti pannakiramanda iti nadumaduma a pamay-an ti panangasaba, panangaramid iti baro a pamay-an tapno maparegta ti maysa ken maysa, ken ti panagtulnogda iti bilin ti Bagi a Manarawidwid ken dagiti gobierno.

Iti amin nga ar-aramiden dagiti kakabsattayo, ipakpakitada ti ayat ken debosionda iti Namarsua kadatayo. Dayta a kinamatalekda ti makatulongto kadakuada a mangibtur kadagiti dakdakkel a pakasuotan iti masanguanan.—Santiago 1:2, 3.