MAYO 3, 2022
SANGALUBONGAN A DAMDAMAG
“Agtalinaedkayo a Nakapokus iti Relasionyo ken Jehova”
Espesial a Programa a Nangpabileg Kadagiti Kakabsat Idiay Ukraine ken Poland
Idi Abril 26, 2022, ni Brother Mark Sanderson, a miembro ti Bagi a Manarawidwid dagiti Saksi ni Jehova, ket simmangpet idiay Poland tapno paregtaenna dagiti kakabsat nga apektado iti madama a gubat idiay Ukraine.
Dagiti kakabsat idiay Poland nga agtrabtrabaho iti Assembly Hall para iti programa
Naawis ti amin a kongregasion idiay Poland ken Ukraine para iti espesial a programa idi Abril 30, 2022. Idiay Poland, dagiti nagbakuit a taga-Ukraine ken dagidiay tumultulong iti trabaho a panangsaranay ket karaman kadagiti naimbitaran nga aktual a mangbuya iti programa iti Assembly Hall idiay Warsaw. Immatender iti programa ti nasurok a 250,000 a taga-Poland ken Ukraine a pakairamanan dagiti konektado babaen ti videoconference.
“Silalagip ken ikarkararagandakayo dagiti kakabsat iti intero a lubong,” kinuna ni Brother Sanderson. “Dagiti kakabsattayo idiay Russia ken Ukraine ket inaldaw a karaman iti karkararag iti sangalubongan a hedkuarter kasta met kadagiti miting ti Bagi a Manarawidwid.” Impasiguradona kadagiti immatender: “Saanna a kayat a sawen nga awanen ti bendision ni Jehova no agrigrigatkayo. Makitkitanakayo, ipatpategnakayo, ken nakaas-asideg kadagiti marigrigatan.”
Grupo dagiti kakabsat a nagbakuit manipud Mariupol, Ukraine, a mangbuybuya iti espesial a programa
Intuloy ni Brother Sanderson: “Agtalinaedkayo a nakapokus iti relasionyo ken Jehova. Ti kalattayo ket saan laeng a makalasat, no di pay ket kayattayo a dagitoy a pakarigatan ti mangpabileg iti pammatitayo ken mangpaasideg kadatayo ken Jehova. Dayta ti isursuro ni Jehova kadatayo.”
Imbaga ni Serhiy, a panglakayen idiay Odessa, Ukraine: “Kadagiti napalabas a lawas, diak makaturturog gapu ta madandanagan, maladladingitan, ken mabutbutengak. Ngem [ti espesial a programa] pinabilegna ti pammatik a saan la nga ay-aywanan ni Jehova ti ilina kas grupo no di pay ket ti tunggal maysa kadatayo.”
Inyestoria ni Tatiana, a maysa a sister a nagbakuit manipud Kyiv, Ukraine: “Talaga a marikriknak ita no kasano kaasideg ni Jehova kaniak. Ar-arakupennak ni Jehova ken marikriknak ti ayatna. Sadinoman ti ayantayo, kanayon nga adda kadatayo ni Jehova.”
Ay-ayatentayo unay dagiti kakabsattayo, ken agtalektayo nga impalagip kadakuada ti espesial a programa ti ‘napudno nga ayat’ ni Jehova iti ilina.—Salmo 136:1.
