Ti panaggraduar ti maika-148 a klase ti Watchtower Bible School of Gilead ket kas met laeng kadagiti napalabas a klase, malaksid iti daytoy: awan ti nagbuya iti auditorium. Amin a bisita ket naikonektar iti programa via livestream. Gapu iti agwarwaras ita a sakit iti intero a lubong, daytoy a naespirituan a programa ti kabaruan a pagarigan no kasano a nakibagay ti organisasion iti agbaliwbaliw a kasasaad.

Naangay ti programa idi Marso 14, 2020, iti educational center dagiti Saksi ni Jehova idiay Patterson, New York. Ni Brother Stephen Lett, a miembro ti Bagi a Manarawidwid, ti tserman iti programa. Adda 55 nga estudiante a naggraduar. a

Sumagmamano a lawas sakbay ti programa ti panaggraduar, nagbalin a paulo ti damdamag iti intero a lubong ti panagwaras ti COVID-19. Kas naipakaammo iti seksion a Newsroom ti jw.org, dayta a situasion ket imonmonitor ti sangalubongan a hedkuarter dagiti Saksi ni Jehova ken mangipapaayda iti direksion iti amin a kongregasion maitunos kadagiti rekomendasion dagiti autoridad.

Maysa kadagita a rekomendasion ket ti pananglimitar iti dadakkel a panagtataripnong. Gapu iti daytoy ken iti dadduma pay a rason, imbilin ti Bagi a Manarawidwid nga awan ti bisita nga umay para iti programa. Awan met ti agbuya iti auditorium. Mapagulidanan ti pamilia ti Bethel ken dagiti estudiante ti Gilead iti panagtulnogda iti dayta a bilin.—Juan 13:34, 35.

Nupay kasta, naaramid ti livestream para kadagiti bisita dagiti estudiante ti GiIead ken iti pamilia ti Bethel. Gapu iti dayta, nasurok a 10,000 a kakabsat iti intero a lubong, agraman dagiti gagayyem ken kapamilia dagiti naggraduar, ti nakabuya iti programa.

Kayat ti Bagi a Manarawidwid a dagiti taripnong para iti panagdaydayaw, nangruna dagiti linawas a gimong iti kongregasion, ket agtultuloy a regular a paset ti panagdaydayawtayo iti laksid ti panagwaras ti COVID-19 iti intero a lubong. Gapu iti dayta, nabiit pay a nangipaay ti Bagi a Manarawidwid iti espesipiko a bilin kadagiti sanga nga opisina iti intero a lubong no kasano nga i-adjust dagiti gimong iti kongregasion sigun kadagiti lokal a kasasaad. Iti dadduma a kaso, mabalin a kaipapanan daytoy a masapul nga agtataripnong dagiti agibumbunannag iti babassit a grupo wenno “aggigimongda” babaen ti elektroniko a pamay-an kas iti videoconferencing. Agtalektayo nga agtultuloy a magunggonaan ti sangalubongan a panagkakabsat iti di magsat a panagayus ti naespirituan a taraon iti amin a kongregasion.

Nalawag nga awan ti makapasardeng iti pannakabalin ni Jehova a tumulong kadatayo kas maysa nga organisasion tapno mapagballigiantayo ti aniaman a lapped.—Salmo 18:29.