Ti panagwaras ti novel coronavirus (COVID-19) iti intero a lubong ap-apektaranna ti minilion a Saksi ni Jehova. Agregreggetda a mangsurot iti bilin dagiti lokal nga autoridad bayat nga itultuloyda ti panagdaydayawda iti Dios. Kadagiti teritoria ti sanga nga opisina nga apektado unay iti virus, agus-usar dagiti kakabsattayo iti nadumaduma a pamay-an ti panangasaba.

Insurat ti maysa a kabsat idiay Pisa, Italy: “Nakabalballigi ti ministeriomi! Adu ti adda iti balbalayda isu a kinitami ken baketko ti nangilistaanmi kadagiti nangted iti numero ti teleponoda ket inyurnosmi ti maki-videoconference kadakuada. Nagadun ti sarungkaran ken iyadalanmi iti Biblia, kabbaro man wenno dagiti nakasaritami idin, ket nagsayaat ti resulta dagiti saritaanmi iti adu nga oras.”

Idiay South Korea, ti panagwaras ti sakit ti makagapu a masansanen nga us-usaren dagiti kakabsat ti adu a feature ti jw.org a website-tayo ken ti JW Library app. Kas pagarigan, di ninamnama ti maysa a kabsat a teksan isuna ti dati nga iyad-adalanna iti Biblia tallo a tawenen ti napalabas. Imbagana a gapu iti panagwaras ti sakit iti intero a lubong, napanunotna a matungtungpalen ti pagilasinan ti maudi nga al-aldaw. Inusar ti kabsat ti “Share Link” a feature ti JW Library app tapno iteksna dagiti maitutop nga impormasion iti dayta a dati nga iyad-adalanna. Imbaga ti kabsat a “makaparegta a makita a daytoy a pagilasinan ti maudi nga al-aldaw ti nangriing iti interes ti adu a tattao maipapan iti Dios ken iti Biblia.”

Paneknekan ti adu a report manipud iti adu a sanga nga opisina iti intero a lubong nga ipatpateg dagiti kakabsattayo ti ministerioda. Makaparagsak a makita no kasano ti panangusarda iti “praktikal a sirib” tapno maitultuloyda nga ikasaba ti naimbag a damag.—Mikias 6:9.