Adu a kongregasion iti intero a lubong ti mangus-usar iti kompiuter ken Internet iti nagduduma a pamay-an tapno makapaggigimongda bayat ti pandemia. Ngem dagiti kakabsat nga adda kadagiti nasulinek a lugar a nakapuy ti Internet ket dakdakkel ti sakripisioda tapno agtultuloy latta ti panaggigimongda, a sursurotenda dagiti safety protocol mainaig iti COVID-19. Kitaentayo ti sumagmamano a pagarigan manipud Africa.

Adu a kakabsat ti awan Internet-na isu a saanda a mausar ti Zoom. Ti sangay iti Malawi linawas a patpatulodanna dagiti panglakayen iti tunggal kongregasion kadagiti video dagiti gimong babaen ti cell phone network. Iwaras dagiti panglakayen dagita a video kadagiti agibumbunannag iti kongregasionda.

Ngem narigat latta daytoy kadagiti 28 nga agibumbunannag iti Tcharo Congregation, nga agnanaed iti kabambantayan iti amianan a paset ti Malawi nga asideg iti Lake Malawi. Awan ti signal ti selpon iti dayta a lugar ta nalingdan kadagiti bantay, isu a masapul nga agbiahe ti maysa a panglakayen iti adu a kilometro a mapan iti lugar a napigsa ti signal. Kalpasanna, agsubli ti panglakayen iti lugarda ken magmagna iti kabambantayan tapno makaasideg iti tunggal pagtaengan dagiti Saksi ket i-send-na dagiti video babaen ti Bluetooth.

Iti nabiit pay, naragsakan dagiti panglakayen ta nadiskobreda nga adda napigsa a signal nga asideg iti lugarda—idiay Lake Malawi. Agbangka dagiti kakabsat nga agpatengnga iti danaw (lake) tapno makaadayoda iti bantay sa ag-download-da kadagiti video. Gapu iti daytoy, dagiti panglakayen ket saanen a kasapulan nga agbiahe iti adayo.

Tapno “mabisita” dagiti kongregasion kadagiti nasulinek a lugar iti makin-amianan a laud a Mozambique, agpalawag dagiti manangaywan iti sirkito iti daytoy a rehion babaen ti selpon. Gapu ta saan a mabalin ti ag-conference call, gagangay nga agpalawag dagiti manangaywan iti sirkito, nga adu ti selpon iti sanguananda a nakakonektar iti agduduma a pamilia iti kongregasion.

Nasulinek unay ti pagnanaedan ti dadduma nga agibumbunannag isu nga awan ti signal iti lugarda. No gimong, magmagna dagiti kakabsat iti kasamekan agingga a makabirokda iti signal. No nakabirokdan iti signal, agtugawdan sa dumngegda iti gimong.

Imbaga ni Brother Yohane Vinho, a manangaywan iti sirkito nga “adu a kakabsat ti agsaksakripisio iti kasta unay tapno makagimongda” isu a natibkerda latta iti naespirituan uray naiputputongda. Kastoy met ti imbaga ni Brother Carlos Cortazão, a maysa met laeng a manangaywan iti sirkito: “Kasla kaduami latta dagiti kakabsat iti Kingdom Hall, nga agkomkomento ken agkankantakami. Talaga a makitkitami nga agtultuloy nga ipapaay ni Jehova ti naespirituan a taraon ti ilina bayat ti pandemia.”—Juan 21:17.