Maragsakankami a mangipakaammo nga iti 2019 a tawen serbisio, nasurok a 300,000 ti nabautisaran kas Saksi ni Jehova. Daytoy ti umuna a gundaway a nasurok a 300,000 ti bilang ti nabautisaran kalpasan ti 1999. Idaydayawtayo ni Jehova gapu iti panangbendisionna iti naregta a panangasaba ken panagaramidtayo iti adalan!

Karaman iti 2019 a tawen serbisio ti dadduma pay a naisangsangayan ken nakallalagip a pasamak: dagiti internasional a kombension, pannakairuar ti Biblia iti nagduduma a lengguahe, ken dagiti makaparagsak a panagiinnayat dagiti kakabsat. Dagitoy ti dadduma a pakadagupan iti report iti intero a lubong. a

• Bilang Dagiti Pagilian a Nagreport: 240

• Timmabuno iti Memorial iti Intero a Lubong: 20,919,041

• Kangatuan a Bilang ti Agibumbunannag: 8,683,117

• Bilang Dagiti Nabautisaran: 303,866

Dagiti nagsayaat a report a kas iti daytoy tignayennatayo a mangtungpal iti balakad ni Apo Jesus kas makita iti tekstotayo para iti 2020: “Inkayo ngarud kadagiti tattao . . . ket pagbalinenyo ida nga adalak, ken bautisaranyo ida.”​—Mateo 28:19.