Uray ar-aramiden dagiti adipen ni Jehova ti amin a kabaelanda tapno maprotektaranda ti bagida ken ti dadduma iti daytoy COVID-19 pandemic, adda latta kakabsattayo a natay. (Eclesiastes 9:11) Makapaladingit ta 872 a patpatgentayo a kakabsat ti natayen gapu iti COVID-19 virus. Alisto dagiti kapammatiantayo a nangsuporta ken nangliwliwa kadagiti agladladingit. (1 Corinto 12:26) Kangrunaanna, agtaltalek dagiti kakabsattayo ken Jehova, a kanayon a mangtungtungpal iti karina iti Filipos 4:7 nga ipaayannatayo iti “talna ti Dios.”

Ti maysa a nagunggonaan iti tulong ti organisasion ni Jehova ket ni Sister Hannchen Unnützer, nga special pioneer idiay Bolzano, iti makin-amianan nga Italy. Makapaladingit ta natay ti asawana a ni Brother Manfred Unnützer idi Marso 28, 2020 gapu iti coronavirus. Nagserbi ni Brother Unnützer iti dandani 58 a tawen iti special full-time service, ket dandani 54 a tawen a kaduana ni baketna iti dayta a panagserbi. Nagkaduada iti 25 a tawen a nagbisbisita iti nadumaduma a sirkito. Ag-1,000 a kakabsat iti nadumaduma a pagilian ti nagbuya iti palawag ti pumpon babaen ti videoconference.

Imbaga ni Sister Unnützer: “Agyamanak unay kadagiti kakabsat. Didak pulos pinanawan, uray maysa laeng nga oras. Aglaplapusanan ti nariknak a dungngoda! Pinaregtadak, liniwliwadak babaen ti Biblia, ken impaayda dagiti kasapulak. Ay-ayatek amin a kakabsatko.”

Ti sabali pay nga agassawa a natulongan bayat ti panagladingitda ket da Darwin ken Maria Jose Moncada. Agserserbida iti Quichua ti lengguahena a lugar iti kabambantayan ti Ecuador. Makapaladingit ta innem laeng nga aldaw ti baet ti ipapatay dagiti nagannak ni Sister Moncada—ni Sister Fabiola Santana Jordan, nga agtawen iti 56 ken regular pioneer, ken ni Brother Ricardo Jordan, nga agtawen iti 60 ken ministerial nga adipen iti Praderas Congregation idiay Guayaquil. Nakaptan met iti COVID-19 virus ti dua a kakabsat a lallaki ni Sister Moncada ngem immimbagdan.

Kasta unay ti ladingit ni Sister Moncada isu a kayatna ti agbiahe iti uppat nga oras tapno maliwliwana ti pamiliana ken matulonganna ida a mangyurnos iti pumpon. Ngem nagkarkararagda ken lakayna ket nagdesisionda a saandan a mapan idiay Guayaquil. Nakikomunikarda laengen kadagiti kapamiliada babaen ti videoconference. Imbaga ni Sister Moncada: “No natuloykami a napan kadagiti kapamiliami, mabalin a nagpeggad koma ti salun-atmi ken ti sabsabali.”

Natural laeng a makarikna ni Sister Moncada iti napalalo a “saem ken danag” a kas iti imbagana. Ngem intultuloyda ken lakayna dagiti naespirituan nga aktibidadda. Kinunana: “Kanayonkami a nagkarkararag ken nagpaiwanwan ken Jehova.” Intultuloyda ti nagsagana para iti Memorial ti ipapatay ni Jesus babaen ti panangawisda kadagiti iyad-adalanda iti Biblia ken panangbasada kadagiti paset ti Biblia maipapan iti maudi nga al-aldaw ni Jesus ditoy daga. Nangasabada met babaen ti panagsurat ken nakigimongda babaen ti videoconference. Inawat ti 9 a saan a Saksi a kabagian ni Sister Moncada ti awisna nga agbuyada iti Memorial iti Spanish babaen ti videoconference.

“Naparegtakami a nakakita kadagiti iyad-adalanmi a nangikagumaan a makikonek iti Memorial, uray narigat dayta para kadakuada,” kinuna ni Sister Moncada. Innayonna: “Naragsakan ken nasorpresakami a nakakita kadagiti kapamiliak a nakikonek met uray addada iti sabali a pagilian.”

Imbaga pay ni Sister Moncada: “Nasursuromi iti daytoy a kapadasan a nupay nasaem ti napasamak kadakami, ti panagtalinaedmi nga aktibo iti panagserbi ken Jehova ti kasayaatan a pamay-an tapno mailiwliwagmi ti saem a marikriknami, ket bendisionan dayta ni Jehova.”

Makipagladingit dagiti kakabsattayo iti intero a lubong kadagidiay natayan iti ay-ayaten bayat daytoy a pandemic, ket itultuloytayo nga ikararagan dagidiay agladladingit. Padpadaanantayo ti tiempo inton pagpatinggaen ni Jehova ti amin a pakaigapuan ti saem ken ut-ot, kas kadagiti makapapatay a sakit, ken pagungarenna ti amin a natay a matalek nga adipenna.—1 Corinto 15:21, 22.