Kas nadakamaten iti immuna a report, ti 2022 ti maika-25 a tawen nga addan opisial a website dagiti Saksi ni Jehova. Ngem idi Agosto 27, 2012, sangapulo a tawenen ti napalabas, nairuar ti baro a disenio ti jw.org. Daytoy a serye nga addaan iti tallo a paset ilawlawagna no kasano a nagunggonaan ti minilion a tattao gapu iti baro a disenio ti jw.org.

Dagiti Video: Kadagiti kombension idi 2012, ti umuna a dua nga episode ti baro a serye a napauluan Agbalinka a Gayyem ni Jehova ket nairuar iti DVD. Ngem saan unayen a maus-usar ti DVD ken nagasgastos ti pannakaaramidna. Ngem idi nairuar iti online ti baro a disenio ti website idi Agosto 2012, nalaklakan a magun-odan dagiti video. Isu nga idi Enero 2013, ti sumaruno nga episode ti Agbalinka a Gayyem ni Jehova, a napauluan iti Kanayon nga Agkararag ket nairuar iti digital format iti jw.org. Sipud idin, nasuroken nga 40 nga episode ti nairuar.

Idi 2013, nairuar met ti video nga Apay nga Adalem ti Biblia? iti digital format. Nagbalin a nagpateg nga alikamen dayta a video iti ministerio ken paset ti Toolbox iti Panangisuro. Manipud idi nairuar dayta a video, nagbalinen a napateg a paset ti trabaho a panangasaba ti pannakaipabuya dagiti video babaen ti jw.org. Kas pagarigan, bayat ti kampania a panagiwaras iti tract a mangyam-ammo iti jw.org idi Agosto 2014, dandani 15 milion a video ti nai-download wenno nabuya.

Kastoy ti kuna ti maysa a brother a timmulong iti pannakadisenio ti jw.org: “Makapabileg iti pammati ta nakitatayo no kasano nga insagananatayo ni Jehova para kadagiti mapasamak iti masanguanan. Dimi ninamnama a ti tiempo ken panagreggetmi a mangaramid iti baro a pamay-an ti pannakaipabuya dagiti video ket nakapatpategto iti masanguanan.” Kas pagarigan, nangrugi ti JW Broadcasting idi Oktubre 2014, ket nasurok a 37 milion a video ti nai-download iti dayta a bulan. Idi nangrugi ti COVID-19 pandemic idi 2020, ad-adu manen a video ti nai-download wenno nabuya manipud iti jw.org. Idi 2022, nasurok a 260 milion a video ti average a nai-download manipud iti jw.org iti kada bulan.

Dagiti Digital a Publikasion: Kadagiti napalabas a dekada, kaykayaten dagiti tattao ti agbasa online wenno iti mobile app imbes a kadagiti nayimprenta a kopia. Gapu iti pannakairuar ti baro a disenio ti website idi 2012, mabalinen a basaen dagiti tattao dagiti magasin iti online sakbay pay a maawatda dagiti nayimprenta a kopia. Gapu ta maar-aramiden dagiti publikasion iti digital format para iti website, nalaklaka metten a naaramid ken nayam-ammo ti JW Library app iti naud-udi a paset ti 2013. Nagsayaat a tool ti app ken ti website-tayo tapno mabasa ken maadaltayo dagiti digital a publikasion.

Idi damo, dagiti publikasion a nairuar kadagiti kombension ket saan pay a magun-odan iti website wenno iti app agingga iti Enero iti sumaganad a tawen. Ngem kadagiti rehional a kombension idi 2015, naragsakan dagiti immatender a nakaammo a mabalindan nga i-download a dagus dagiti digital nga edision dagiti nairuar iti kombension—karaman ditoy ti libro a Ni Jesus—Ti Dalan, ti Kinapudno, ti Biag ken ti broshur nga Agsublika ken Jehova, kasta met ti video nga Ania ti Pudno nga Ayat? Iti simmaganad a tawen, bayat ti JW Broadcasting a programa iti Mayo 2016, ni Brother Anthony Morris a miembro ti Bagi a Manarawidwid inruarna ti broshur a Sungbat iti 10 a Saludsod Dagiti Agtutubo ken impakaammona a mabalinen a ma-download a dagus dayta. Daytoy ti damo a pannakairuar ti maysa a publikasion nga aggigiddan para kadagiti kakabsat iti intero a lubong.

Nabayagen nga agus-usar ti organisasion ni Jehova iti teknolohia a mangikasaba iti naimbag a damag maipapan iti Pagarian ken matulongan dagiti kakabsat. Maragsakantayo a makakita a maus-usar ti jw.org a website tapno magun-odan ti ‘taraon iti umiso a tiempo.’—Mateo 24:45.

• Video a maida-download iti kada bulan

• Inaldaw a mangbisita iti website iti kada bulan

• Pannakairuar ti Kanayon nga Agkararag, Enero 2013

• Pannakairuar ti JW Library app, Oktubre 2013

• Sangalubongan a panagiwaras iti tract a mangyam-ammo iti jw.org, Agosto 2014

• Panangrugi ti JW Broadcasting, Oktubre 2014

• Dagiti nairuar iti kombension ket magun-odanen iti elektroniko a format, Mayo 2015

• Sangalubongan a pannakairuar ti Sungbat iti 10 a Saludsod Dagiti Agtutubo, Mayo 2016