Kadagiti napalabas nga artikulo iti daytoy a serye, naireport no kasano a maus-usar ti jw.org a mangiruar kadagiti digital a publikasion ken video-tayo, kasta met a mangipaay iti umiso a damag maipapan kadagiti kakabsattayo iti intero a lubong. Ilawlawag daytoy maudi nga artikulo no kasano a maus-usar ti jw.org a mangsuporta iti sangalubongan a panangasaba.

Lengguahe: Nairuar idi Agosto 2012 ti napabaro a disenio ti website. Naipatarus idin ti home page iti 139 a lengguahe. Idi Agosto 2014, kabayatan ti pannakaikampania ti tract a mangipakaammo iti website, addaanen dayta iti nasurok a 500 a lengguahe. Nakaskasdaaw ta ramanenna ti 22 a sign language. Ita, naglaonen ti website iti nasurok a 1,070 a lengguahe, a pakairamanan ti nasurok a 100 a sign language.

Naintiempuan nga Artikulo: Idi Oktubre 2019, nabaliwan ti disenio ti home page ti jw.org. Itampoknan ti maysa a kangrunaan nga artikulo nga addaan iti dakkel ken makapainteres a ladawan ken adda tallo nga artikulo iti babana. Daytoy a disenio ket nasaysayaat a pamay-an a pangiturong iti atension kadagiti impormasion iti website a mainaig iti ministerio. Idi agangay, inorganisar ti Writing ken Art Department ti naparpartak a proseso ti panangaramid kadagitoy a kangrunaan nga artikulo ken ladawan tapno masigurado a ti linaon ti home page ket naintiempuan ken maipapan iti agdama a paspasamak. Kas pagarigan, intampok ti home page dagiti artikulo maipapan iti COVID-19 pandemic, kasta met ti gubat ti Russia ken Ukraine, ken ti resultana a panagbakuit dagiti tattao.

Mabirokandatayo Online: Ti website a jw.org ket makatulong kadagiti interesado a tattao tapno makabirokda iti umiso nga impormasion maipapan iti organisasiontayo ken iti trabahotayo. Maysa met daytoy a pamay-an a pangkontakan dagiti tattao kadagiti Saksi ni Jehova no kayatda ti makasursuro iti ad-adu pay. Maysa nga umel a babai ti nakipagadal iti Biblia kadagiti Saksi ni Jehova idi tin-edyer pay laeng ngem naisardeng dayta idi immakar iti pagtaengan. Kayatna nga itultuloy ti panagadalna ngem awan pay ti Saksi a bimmisita kenkuana iti baro a pagtaenganna. Nalagipna ti website a jw.org ket inusarna ti online form a nagkiddaw iti bumisita kenkuana. Kalpasan laeng ti sumagmamano nga aldaw, dua nga special pioneer ti nagtuktok iti ridawna. Saanna la a naitultuloy ti panagadalna no di ket nakagimong payen. Bautisado itan ken isursurona ti tallo nga annakna maipapan ken Jehova. Imbagana: “Agyamyamanak ken Jehova gapu iti website ta no saanak a nag-fill out iti online form, nagur-urayak latta koman nga adda mairana a makasaritak a Saksi.”

Bayat nga umad-adu ti tattao a kaskasabaantayo, makaparegta a maammuan nga itultuloy ti organisasion ni Jehova nga ipaay dagiti epektibo a tool tapno masuportaran ti panagrang-ay ti ministeriotayo.—Isaias 60:22.

• Video a maida-download iti kada bulan

• Inaldaw a mangbisbisita iti website iti kada bulan

• Pannakairuar ti opisial a logo ti jw.org, Marso 2013

• Addan dagiti sign language iti website, Hulio 2014

• Nabaliwan ti disenio ti home page tapno ad-adda a maala ti interes ti publiko, Oktubre 2019

• Naipakaammo ti pannakairuar ti libro nga Agbiagka a Naragsak iti Agnanayon!, Enero 2022