Nangrugi idi Enero 1, 2024, mabalinen ti agpasiar iti Patterson Visitor Center a masarakan iti Watchtower Educational Center iti Patterson, New York, U.S.A. Ti maysa a nagpateg a paset ti museum ket ti “First-Century Bible Village.” Imbaga ni Brother Isaiah Miller, nga agtrabtrabaho iti Museum Department iti Bethel: “Nadisenio ti Bible Village tapno makita ken mapadasan dagiti bisita no kasano ti biag dagiti tattao idi panawen ni Jesus. Ipakita dagiti panagadal a dakkel ti epektona kadagiti tattao, aniaman ti edadda, no mapadasanda a mismo ti maysa a banag.” Imbaga ti maysa a babai kalpasan a nag-tour: “Kasla aktual nga addaak iti Israel idi umuna a tiempo. Nagmayat!”

Makita iti dayta a paset ti museum dagiti kasla agpaypayso nga animal, makan, mulmula, ken dagiti inaldaw nga ar-aramiden dagiti Israelita idi umuna a siglo. Kas pagarigan, dagiti kayo ti olibo iti museum ket nadisenio babaen kadagiti manomano a pagmoldean a kalanglanga dagiti kayo ti olibo iti Israel. Mabalin nga aggiling dagiti bisita iti bukbukel iti dakkel a gilingan a bato a kapada ti agpaypayso a gilingan. Mabalinda met ti aglugan iti pagkalap a bangka a kapada ti nagluganan ni Jesus ken dagiti adalanna. Excited ti maysa a brother a nangibaga: “Kaslaak la adda a mismo iti eksena idi imbaga ni Jesus iti baybay: ‘Agsardengka! Agtalnaka!’” (Marcos 4:39) Bayat nga agpaspasiar dagiti bisita iti kasla agpaypayso a sinagoga, maimadyinda a nakatugawda ken dumdumngegda a naimbag bayat a maibasbasa iti napigsa ti Sao ti Dios.

Ti sabali pay a naidumduma a paset ti panag-tour ket ti pannakisarita kadagiti kakabsat a nagakem nga Israelita idi umuna a siglo. Mabalin a padasen dagiti bisita dagiti trabaho a gagangay nga ar-aramiden dagiti tattao idi panawen ni Jesus. Imbaga ti sangapulo ti tawenna a ni Marcos, “Nag-enjoy-ak unay idi tinulongak diay karpintero nga Israelita a mangaramid iti maysa a bangkito!” “Uray siak,” kuna ni Rebecca nga agtawen iti walo. “Kaykayatko met ti aggiling ken agaramid iti arina.”

Adda pay sabali a tallo a seksion a makita iti Patterson Visitor Center. Ti eksibit a “First-Century Bible Coins” ipakitana dagiti orihinal a baria idi umuna a siglo, agraman ti manmanon a makita a baria a tetradrakma. Ti museum nga “All Your Sons Will be Taught by Jehovah” ipakitana ti nagduduma nga eskuelaan nga insagana ti organisasion ni Jehova ken dagiti pagsayaatan nga ipaay ti edukasionna. Ti museum a “Defending and Legally Establishing the Good News” estoriaenna ti ulidan dagiti matalek a kakabsat iti nagduduma a pagilian a naipasango iti pannakaidadanes ken ipakitana no kasano a kanayon a tinulongan ida ti organisasion ni Jehova.

Maawis dagiti kakabsat iti intero a lubong nga umay ag-tour iti Patterson Visitor Center. Sigurado a bumileg ti pammatiyo gapu iti daytoy a regalo ni Jehova. Maysa daytoy a pamay-an nga ipakpakita ni Jehova nga ay-ayaten ken ipatpategna unay ti ilina.—Santiago 1:17.