Minilion a Saksi ken interesado ti agtitipon inton Martes, Abril 7, 2020, para iti kapatgan a panagtataripnong iti daytoy a tawen, ti Memorial ti ipapatay ni Kristo. Ngem iti daytoy a tawen, gapu iti COVID-19 a nagwaras iti intero a lubong, naisangsangayan ti panangselebrartayo iti Memorial. Adu ti agtitipon iti intero a lubong babaen ti videoconference.

Gapu iti coronavirus, imparit dagiti autoridad iti adu a lugar ti panagtitipon dagiti dadakkel a grupo. Gapu iti dayta, adu a kongregasion iti intero a lubong ti aggigimong iti linawas babaen ti videoconferencing. Usaren met dagitoy a kongregasion ti videoconferencing iti panangselebrarda iti Memorial. Para iti publiko, adda nasaksakbay a nairekord a programa a mabuya iti jw.org.

Iti napalabas a tawen, nasurok a 20 a milion ti immatender iti Memorial. Manamnama a minilion a tattao ti agatender iti Memorial babaen ti videoconference, telephone hook-up, wenno panangbuya iti nairekord a programa iti jw.org.

Iti adu a pagilian, agtultuloy ti panagwaras ti virus ket agpegpeggad ti adu a tattao. Tapno agtalinaed a natalged dagiti kakabsat, masapul nga itultuloytayo amin a suroten ti instruksion dagiti autoridad agingga nga agpatingga ti panagwaras daytoy a sakit. Ngem agtalektayo a gapu iti tulong ni Jehova, masurottayo ti bilin ni Jesus nga “itultuloyyo nga aramiden daytoy kas panglaglagip kaniak.”—Lucas 22:19.