Idi Hunio 28, 2023, nakaawat iti nakapatpateg nga approval ti proyektotayo iti Ramapo iti New York, U.S.A. Ti amin a miembro ti Town of Ramapo Planning Board inaprobaranda ti site plan ti proyekto. Nupay adda pay dagiti detalye a masapul a maileppas, makatulong daytoy nga approval tapno maituloy daytoy a proyekto.

Makapainteres ta awan ti lokal a residente ken opisial a kimmontra wenno nangibaga nga adda problemada bayat ti miting ti Planning Board. Imbaga ni Brother Keith Cady, a maysa a miembro ti Construction Project Committee (CPC): “Adu a bulan a nagsaganakami a mangi-submit iti site plan-tayo iti board ken mangsurot iti amin nga agaplikar a regulasion. Kayatmi a nalaka nga aprobaranda ti aplikasiontayo.” Nakita ti board dagitoy a panagregget ken nagkaykaysada a nangawat iti kada resolusion a naipresenta maipapan iti proyekto. “Awan pay maysa nga oras, nalpasen ti miting!” imbaga ni Brother David Soto, sabali pay a miembro ti CPC. “Agyamantayo iti Planning Board iti panagregget, kinagaget, ken kooperasionda. Padpadaananmi ti makipagtrabaho iti planning department ti Ramapo.”

Gapu iti daytoy nga approval, mabalinen nga irugi dagiti napateg a trabaho iti proyekto iti Ramapo. “No maikkaten dagiti napukan a kayo iti property,” inlawlawag ni Brother Cady, “mabalinen nga irugi dagiti kontraktor dagiti trabaho iti site. Isu a kasapulantayo ti ad-adu pay a boluntario mangrugi iti maudi a bulbulan ti 2024. Eksaytedkami amin a presente iti miting idi nangngegmi ti nagkaykaysa a panangaprobar ti board iti dandanin panangrugi ti trabahotayo.”

Kas sangalubongan nga organisasion, agyamantayo ken Jehova iti daytoy nga approval. Ikararagtayo ti agtultuloy a pamendisionna iti amin a tumultulong iti daytoy a proyekto bayat a ‘pappapigsaenda dagiti imada tapno maibanagda ti nasayaat a trabaho’ iti masanguanan.—Nehemias 2:18, footnote.