Gapu iti sangalubongan a krisis mainaig iti salun-at, ar-aramiden dagiti kakabsattayo iti adu a pagilian dagiti naespirituan nga aktibidadda iti pamay-an a maitutop iti kasasaadda. Iti adu a lugar, temporario nga aggigimongda babaen ti videoconference imbes a mapanda a mismo iti Kingdom Hall. Gapu iti dayta, binaliwan met ti dadduma ti pamay-an ti panangsuportada iti sangalubongan a panangasaba babaen ti panagdonarda online.

Dagiti Saksi ni Jehova iti agarup 112 a pagilian mabalin nga usarenda ti donate.pr418.com a mangted iti donasionda online, kas iti panagusar iti debit wenno credit card.

Kaaduan nga agibumbunannag ti saanen a makaited iti donasionda iti Kingdom Hall-da, isu nga adu a kakabsat ti mangus-usar iti automatic money transfer tapno maipaayda ti binulan a donasionda babaen iti donate.pr418.com. Dayta ti us-usaren ni Sister Susan Cohen, agtawen iti 74 nga agibumbunannag iti United States, tapno maipaayna ti donasionna. Kunana: “Naglaka laeng; no kabaelak, kabaelan met ti dadduma. Maragsakanak a makaammo a makapagdonarak latta.”

Napanunot idin ni Brother Eduardo Paiva a taga-Brazil nga usaren ti donate.pr418.com no maliwayanna ti mangipaay iti donasion iti Kingdom Hall. Kunana: “Nabiit pay a napanunotko a nagsayaat gayam dayta a pamay-an tapno agtultuloy a masuportaran ti sangalubongan a trabaho iti tiempo ti emerhensia ken rigat. Mausartayo dayta tapno maipakita ti panagyaman ken ayattayo bayat ti maudi nga al-aldaw.”

Kuna ni Brother Gajus Glockentin, a manangaywan iti Treasurer’s Office iti sangalubongan a hedkuarter dagiti Saksi ni Jehova iti Warwick, New York: “Makapabileg iti pammati a makita ti tarigagay dagiti kakabsat a mangsuporta iti trabaho mainaig iti Pagarian. Us-usarentayo a naimbag dagitoy a donasion. Agtultuloy a suksukimatentayo dagiti trabaho iti intero a lubong tapno maammuan no ania dagiti paggastuan a masapul a maksayan ket mausar dagiti donasion iti kasayaatan a pamay-an. Nupay masapul a kissayan ti dadduma ti donasionda, saan a naksayan ti kinatulokda a mangsuporta iti organisasion ni Jehova.”—2 Corinto 9:7.