Manipud Hulio 20 agingga iti Agosto 20, 2023, nasurok a dua a milion a tattao ti napan iti FIFA Women’s World Cup soccer tournament. Napasamak dayta iti nagduduma a siudad iti intero nga Australia ken New Zealand. Bayat ti tournament, agarup 1,200 a kakabsat ti nakipartisipar iti espesial a panangasaba a naaramid iti siam a siudad kadagita a pagilian. Saan a nababbaba ngem 18 a tattao ti nagkiddaw a mayadalanda iti Biblia.

Adda dua nga agtutubo a babbai a taga-India nga immasideg iti cart iti Sydney, Australia. Nadlawda ti poster a mangyaw-awis iti libre a panagadal iti Biblia. Dinamagda kadagiti sister no sadino ti pagatenderanda iti kasta a panagadal. Imbaga dagiti sister a kaaduanna nga adda maysa a mangisuro iti kada indibidual maipapan iti Biblia. Inlawlawagda pay iti dua a babbai a mabalinda ti ag-request nga adda personal a bumisita kadakuada babaen ti panang-scan-da iti QR code iti broshur nga Agbiagka a Naragsak iti Agnanayon! Dagus a nag-fill up dagitoy a dua a babbai iti online form, ket nairugi a mayadalan ti tunggal maysa kadakuada iti Biblia.

Adda agassawa a Saksi idiay Brisbane, Australia, a nangtulong iti maysa nga agtutubo a babai a nadlawda a kasla nayaw-awan. Imbaga ti babai a birbirokenna ti hotel-na. Gapu iti dayta, tinulongan ti agassawa a mangbirok iti hotel-na. Bayat nga agbirbirokda, imbaga ti babai a taga-Papua New Guinea isuna. Nasdaaw ti babai ta naammuanna a nagyan met idi ti agassawa iti Papua New Guinea. Nagragsak ti panagsasaritada, ken intedda ti pangkontakanda iti tunggal maysa. Idi kuan, nakitulag kenkuana ti agassawa a Saksi nga ipasiarda iti siudad, isu a naaddaanda iti gundaway a mangiranud kadagiti kinapudno iti Biblia. Idi nakasublin ti babai iti Papua New Guinea, nangrugi a makipagadal iti Biblia.

Iti maysa a publiko a pagparkingan idiay Auckland, New Zealand, kinasarita ti sister a ni Terina ti dua a security guard a Punjabi ti lengguaheda. Idi kuan, immasideg ti sabali pay a guardia sa kinasaritana ti dua a guardia iti Punjabi, isu a naisardeng biit ti pannakisarita ni Terina kadakuada. Pampanunoten ni Terina no ungtan ida ti guardia gapu ta makitungtungtongda kenkuana bayat ti duty-da. Ngem nasdaaw ni Terina idi imbaga ti guardia nga ipatpatarusna kadakuada ti pagsasaritaanda. Imbaga pay ti guardia: “Dinamagda kaniak no ania ti Biblia, ket imbagak a libro dayta a naggapu iti Dios. Husto kadi?” Idi naammuan ti guardia a husto ti imbagana, impakita ni Terina kadakuada a tallo no kasano ti agkiddaw iti panagadal iti Biblia iti website a jw.org iti mismo a lengguaheda.

Maysa a lalaki a taga-Colombia nga agnagan Nicholas ti immasideg iti literature cart idiay Brisbane, Australia. Dinamagna ti maipapan kadagiti gimongtayo. Imbagana a Saksi ni Jehova ni nanangna ken da lolo ken lolana ket parparegtaenda isuna a makigimong. Inyurnos dagiti agka-cart a kakabsat nga adda mangkontak kenkuana a Saksi manipud iti Spanish a kongregasion. Awan pay maysa oras, kinontak ti maysa a brother nga agsasao iti Spanish ni Nicholas ken implanoda ti panagatenderna iti “Agan-anuskayo”! a Rehional a Kombension iti dayta met la a ngudo ti lawas.

Maragragsakantayo ta naaddaan iti gundaway dagiti kakabsattayo idiay Australia ken New Zealand nga ‘agsilnag kas silsilaw’ babaen ti panangipakaammoda iti naimbag a damag ti Pagarian bayat ti tournament.—Filipos 2:15.